CM thusawiin mipui thin a ṭháwng - ZPM Ṭhalai
ZPM Ṭhalai chuan, Independence Day vawi 77-na Lammuala lawmnaah chief minister Zoramthanga'n, 'Kum li leh a chanve chhunga kan hnathawhte a lungawithlak thawkhatin kan hria,' tia a sawi chuan mipui thina ṭháwng hle niin an tarlang.
Independence Day-a Chief Minister thu sawi chungchangah ZPM ṭhalaite chuan thuchhuah siamin, "Kum li leh a chanve chhunga kan hnathawhte hi a lungawithlak thawkhatin kan hria, a ti chu mak kan tiin, lungchhiathlâk kan ti a, CM thusawi hian mipui a ṭháwng hle a ni," an ti a; MNF kaihhruai sorkarin hna an thawhte lungawithlak a tih chhan sawifiah turin an phût.
CM Zoramthanga leh MNF sorkarin mipui laka an thutiamte a hlawhtlinna hmuh tur mumal a awm lo nia sawiin, ZPM Ṭhalai chuan, "Term tàwp dawn thlenga Chief Minister a ṭawngvai reng mai hi mipui zah lohna lian takah kan ngai," an ti a; MNF sorkar chu siamṭhat leh ngaihna awm loa an ngaih thu leh hunin a liampui mai dawna an ngaih thu an tarlang.
ZPM ṭhalaite chuan, "A duhsak zawngte hnena restricted tender a pe te, Kamrula leh a tupa Zoramchhana hnena contract hna lian zawng zawng deuhthaw a pe te, Airport sak chim leh hna chhe lutuk te, chakai farm-a broccoli leh dhania hlir awm te, SEDP board vanga kum tin mipui sum cheng nuai za tam ral ziahte hi em ni lungawithlak a tih chhan, tih hi kan zawhna a ni," an ti.
CM Zoramthanga'n kum 2018 inthlan hmaa a tiam - traffic jam awm tawh lohna khawpuia Aizawl siam te, kawng chhâwng siam te, chhung tin hnena SEDP aṭanga Rs 3,00,000 pek te, Mizo buh hlîr ei tawh tur tih te, Lammual aṭanga Assam Rifles sawn chhuahte chu tihhlawhtlin a la nih loh thu an sawi bawk.