Upate tan a thlâwna inentirna buatsaih

Health & Family Welfare department, National Health Mission, National Mental Health Programme, National Programme for Health Care of Elderly leh Alzheimer's and Related Disorders Society of India (ARDSI), Mizoram Chapter-te chuan nimin khan Chanmari YMA Hall-ah upate pualin a thlawna inentirna an buatsaih a, mi 100 an inentir.

Free clinic hmanpuitu Dr Eric Zomawia, NHM mission director chuan, rilru lam harsatna neite tan TeleMANAS helpline 14416-ah engtik lai pawha biakràwn theih an awm thu sawiin, "Helpline din tirh aṭanga July 31, 2023 thleng khan phone call hmanga ṭanpuina diltu mi 2,853 an tling tawh," a ti.

Dr Eric Zomawia chuan, 'Hrisel tak leh harhvâng taka dam rei' tih thupuia hmangin district tinah health & wellness centre a awm a, mi thiamte ràwn theih reng a nih thu a sawi a; rilru leh a kaihhnawih lama harsatna tâwkte'n inzêp mai lo a, mithiamte biakràwn nachang an hriat a pawimawh thu a sawi bawk.

ARDSI, Mizoram Chapter president Vanneihtluanga chuan, kum upate tan mahni induat thiam a pawimawh thu leh inpawm thiam a pawimawh thu sawiin, kum upatnain a ken tel harsatna hrang hrang tâwkte tan ARDSI, Mizoram Chapter helpline-ah ṭanpuina dil theih reng a nih thu a sawi.