MP-in Photo Art Exhibition a hawng

Mizoram Shool of Photography leh Photography Club of Mizoram chuan World Photography Day kum 184-na pualin nimin khan Millennium Center chhuatzawl (atrium)-ah Photo Art Exhibition vawi 7-na an buatsaih a, Rajya Sabha MP K Vanlalvena'n a hawng.

Photo Art Exhibition hian ni thum awhin, August 19 thleng neih a ni dawn a; a duh a piang tana tel theih niin, mi 79 an tel. Exhibition-a telte'n thlalak an thehluh chu 332 niin, category pahnih - Colour leh monochrome section-ah ṭhen a ni a, exhibition-a tarlan turin thlalak ṭha zual 70 thlan a ni.

Mizoram School of Photo-graphy dintu Malsawmtluanga sawi danin, exhibition-ah hian thlalakte man tláwm zawka lei theih a ni a; thlalak tarlan aṭangin a ṭha ber thlan a ni dawn a, colour leh monochrome section-a pakhatnate chu national contest-ah tirh an ni ang.

Exhibition hawngtu K Vanlalvena chuan, thlalak chu thil pawimawh, document pawimawh a nih thu sawiin, "Thua sawia fiah tâwk lohte tihfiahna a tan a ṭangkai hle. Thlalak leh mihring nun hi tunah chuan a inzawm tlat tawh a, mi tam takin eizawn nan an hmang tawh a ni," a ti.

Mizoram School of Photogra-phy hi kum 2017 khan din niin, National Academy of Photo-graphy, Kolkata-in a pawmpui a ni a, mi 100 vel an inzir chhuak tawh. World Photography Day 2023 pualin thisen an lo pe tawh bawk.