ECI-in state leh union territory-a CEO hnuaia media cell-te an kâwm

Election Commission of India (ECI) chuan nimin khan India rama state leh union territory-a chief electoral officer (CEO) hnuaia Media Cell-te video conferencing hmangin thil pawimawh an sawipui a; Mizoram aṭang pawhin Media Cell Member Secretary hoin member pathum NIC Conferencing Room aṭangin an tel.

ECI hotute chuan, media leh social media hrang hrangah thu dik lo leh belhchian dâwl lo thehdarh ṭhin te, mipui tichiai zawnga thu thehdarh ṭhinte leh media hmanga political party-te an inpuanzar (advertise) dante fimkhur leh chîk taka vil turin media cell-te an chah a ni.

Kumina Mizoram inthlanpui awm turah Mizoram CEO hnuaiah Media Cell din a ni tawh a, additional CEO H Lianzela chu nodal officer niin, deputy CEO Henry C Lalrawnkima chu member secretary a ni. Member-ah IPR deputy director Mina Zoliani Joute, ICT informatic officer Vanlalringa leh programmer H Vanlalruatfeli te an awm bawk.