Thawktu indaih loh thu minister hrilh

Lawngtlai District Task Force on Ruihhlo Do chu Social Welfare & Tribal Affairs minister Lalrinawma hoin August 16, Nilaini khan DC conference hall-ah an ṭhukhawm. Lawngtlaia Excise & Narcotics depart-ment-ah thawktu an indaih loh thu leh dah belh ṭul an tih thu Minister an lo hrilh.

Minister Lalrinawma chuan, tunlaiin ruihhloin Mizoram a tuam mek thu sawiin, "Thingtlang kilkhâwr thlenga a luhchilh tawh avangin thapui chhuaha do a ngai. Ruihhlo tam tak man a ni tawh chunga a kiam hlei thei lo hian ṭanrualna nena do a ngaihzia a lan chiantir hle a ni," a ti.

Lawngtlai West bialtu MLA H Biakzaua pawhin thu sawiin, Lawngtlai district chu ram dang nena ramri thui tak inṭâwm a nih avangin ruihhlo luhna kawngka remchang tak a nih thu leh vên uluk a ngaih thu a sawi. MLA hian Central YLA hnuaia ruihhlo dotu Drug Reduction Squad hnenah a ṭula hman atan Rs 50,000 a hlan a ni.

Ṭhutkhawmah hian Lawngtlaia Excise & Narcotics department hotute chuan, thawktu an indaih lo lutuk chu an harsatna a nih thu leh thawktu an mamawh belh thu an sawi a; Lairam Rescue Centre chu sorkarin pawmpui se an duh thu an tarlang bawk.