KHAWTHLIR

Minister-in tlawh

Social Welfare & Tribal Affairs minister Lalrinawma chuan nimin khan Thiltlang, Hnahthial district-a Eklavya Model Residential School (EMRS) sakna tur hmunhma a enfiah a, sorkar official-te leh khawtlang hruaitute'n an ṭawiawm. EMRS hi Central Board of School Education hnuaia awm a ni a, cheng nuai 4,800 sênga sak tur niin, contractor chu TCIL Consultant a ni.

DC hoin thukhawm

Serchhip District Task Force on Immunization leh District Anaemia Mukt Bharat Steering Committee chu nimin khan DC David Lalthantluanga hoin an ṭhukhawm. Sakhaw thil vanga hri danna (vaccine) la duh lo zingah vawi tam tak kalchilh hnua la duh an awm tih tarlan a ni. Sikul naupang zinga iron folic acid sem chhuah zat report chu a hun takah dawn kim a nih ṭhin loh avangin harsatna an tawh ṭhin thu leh, internet hmanga awlsam leh kimchang zawka report thehluh dan tur ruahman a nih thu tarlan a ni bawk.

Lakhuihthei vailiam

Tuichangral Organic Farmer Producer thar lakhuihthei quintal 6 chu nimin zing khan Mumbai-a Josie’s Kitchen, North East Cuisines panpui turin Agriculture director James Lalsiamliana, Mission Organic Mizoram (MOM) mission director ni bawkin a vailiam. Lakhuihthei hi Mizoram sorkar enkawl MOM leh Clover Organic ṭang dunin MOVCD-NER scheme phase-III kaltlanga an thawn chhuah a ni a; kar hmasa khan quintal 5 an thawn chhuak tawh bawk.

Thukhawchang-2

R Lallianzuala buatsaih 'Thukhawchang-2' tih lehkhabu chu nimin khan Home minister Lalchamliana'n a pisaah a tlangzarh. Home Minister chuan lehkhabu tlangzarh tak chuan Mizo nunphung leh thu leh hla chawisan zel kawngah nasa taka hlawkna a thlen ngei a beisei thu a sawi. Thukhawchang-2 hi Dr J Liankhûma thu ziah hrang hrang dah khawmna a ni a, Rs 150 man a ni.