KHAWTHLIR

Home-ah dah

Tun hnaia social media-a video darh, hmeichhe tleirawl pakhatin hmeichhe naupang nasa taka kut a thlâk chungchangah, Juvenile Justice Board (JJB) chuan video-a kutthlaktu ber hmeichhia chu observation home-a enkawl turin thutlukna a siam. Video-a lang ve lo, thil thlenna hmuna awm ve hmeichhe naupang dang chungchang chu August 24, 2023 khian JJB chuan a ngaihtuah ang.

PUC-in thisen pe

Pachhunga University College NSS unit chuan an college kum 65-na tlin pualin nimin khan an campus-ah Civil Hospital, Aizawl tan thisen unit 171 an pe a, petute mipa 108 leh hmeichhia 63 an ni. Thisen peknaah hian PUC NSS Award sem nghal niin, Dr Lalthankungi Award leh Dr Zoramdinthara Award te chu C Zothanpuia leh Lalrempuii te hnenah hlan a ni. Tun ṭum hi PUC-in academic session kal meka thisen an pek ṭum thumna a ni.

Ralthuam man

Assam Rifles sipaite chuan August 17, Ningani khan Lawngtlaiah mi pakhat hnen aṭangin ralthuam - pistol leh revolver pakhat ve ve an man. AR chuan, ralthuam kawltu hian mi dang hnena a hralh tur a nih thu an tarlang.

Sadbhavana Diwas

Mizorama sorkar hnathawkte chu nimin khan ram leh hnam inpumkhatna leh chi leh chi inkarah muanna a awm theih nan ṭan la turin an intiam. Sadbhavana Diwas puala intiamna (pledge) sawi rualna hi Secretariat-ah chuan chief secretary Dr Renu Sharma hoin hman a ni a, sorkar pisa dangahte pawh hman a ni. Sadbhavana Diwas hi August 20 a ni a, kuminah Pathianniah a tlak avangin nimin khan hun hman a ni.

Sarâng enfiah

Lunglei District Enforcement Squad for Single Use Plastic Free chuan nimin khan Lunglei Chanmari-III aṭanga Salem Veng inkara dawr hrang hrangah hman khat daih sarâng hmang an awm leh awm loh an endik a, dawr tam zawkah hman a ni tih an hmu. Danin a phal lo sarâng hmangtute chu lei chàwi an inhuam tih intiamtir an ni.

Zirlai lawmpui

MSU Regional Hqrs, Lunglei chuan nimin khan Saikuti Hall-ah Lunglei district-a zirlai ti ṭhate lawmpuina hun an buatsaih a, minister C Lalrinsanga leh HPC vice chairman Lawmawma Tochhawng, MLA ten an hmanpui. He hunah hian mi 42 hnenah lawmpuina hlan a ni.

Feast Day hmang

St. Lawrence School, Ramthar Veng chuan nimin khan Feast Day cum Parents Day an hmang a, bialtu MLA Dr Vanlalthlana'n a hmanpui. MLA chuan, zirlaite chu mi dangte tana malsawmna ni turin a fuih a; zirtirtute chu an zirlaite tana ṭha ber pe tura chahin, "Mite’n engtinnge kan chanchin an sawi ang tih ngaihtuah chungin hun i hmang ang u," a ti. St. Lawrence School hi kum 1992-ah din a ni a, zirlai 732 an awm mek a ni.

Solar light pe

AMC Ward XIV councillor Ramthanzauvi chuan nimin khan a biala YMA, Khatla Branch hnenah Khatla thlànmuala dah tur solar light panga a pe. Ramthanzauvi chuan, thlanmual chu hmangaihte zalhna hmun a nih avangin nuam taka siam a ṭul thu a sawi.

Leiminin in a hnawl

Nimin tlai dar 5 vel khan Zemabawk Bethel Veng, Mitlamual panna kawnga KC Zauva te chenna in, Assam type chu a chhak aṭanga leiminin a hnâwl avangin a chim. In chim laiin KC Zauva te chhungkua bakah an hnathawkte nen mi pasarih vel an awm a, an vai hian a chimpui. Mi pathum an hliam a, ngaihtuahawm lutuk an ni lo nia thu dawn a ni.