NH kawng chhiat lai ber a ni mek - MJA: DC leh MJA-te'n kawng chhia an enfiah

Mizoram châk lakna ber national highway kawngpui chu Bualpui dâi velah a chhiat lai ber a ni mek tih MJA, Kolasib member-te chuan an sawi. Hei vang hian kawng thawm ṭhat thuai a nih theih nan hma la turin nimin khan Kolasib bawrhsap John LT Sanga an ngen a; DC bakah SP Lalrinawma Ṭaite te nen kawngpui chhe laite an enho nghal.

Kolasib MJA-te chuan, "National highway kawngpui hi tunlaiin a chhiat lai ber hun a thleng mek a, kawng chhia avang hian lirthei tlân mumal thei loin rei tak tak an tangkhang ṭhin. Tunah hian Kolasib SP ruahmannain lirthei intlân chhâwktir a ni," an ti.

MJA hruaitute chuan, kawngpui chhe lai nimina an en lai hian Kolasib lam aṭanga Aizawl lam pan tur truck bungraw phur 200 chuang kawng chhia vangin an din thu leh, kawng chhe laiah police pali an duty a, NHIDCL-in an rawih YMA member mi palite'n police duty-te an puih ṭhin thu an sawi.

NHIDCL hotute chuan, fûr thleng tur an hria a, mahse, sum an hmuh theih loh avangin contractor-te hna an thawhtir ngawt theih loh thu Kolasib DC an hrilh niin an sawi a; kawng khuar hnawhna tur lung (boulder)-ah harsatna an neih chu tunah quarry an hmuh tawh thu an sawi rualin, hna thawktu (labour) turah harsatna an neih leh thu MJA member-te an hrilh.

Kawngpui chhe zual lai hi Kolasib MJA-te chuan June 29, 2023 khan an lo tlawh tawh a, chutih lai chuan Ratna Infrastructure chhawr reng chungin contractor dang Sanjit Baruah, Guwahati-in kawng sir tihfai leh kawng khuar (pot hole) hnawh bakah, hna tênau dang siam hna an thawk. MJA member-te chuan, fûr ruahtui a tam tak tak hma ngeia kawngpui chhe zual lai thawm ṭha turin NHIDCL an ngen a ni.

Hna thawh hun (working season) chhunga kawng an siam loh chhana NHIDCL chhuanlam, sum an hmu lo tih chu chhuanlam tlinga an ngaih loh thu MJA member-te chuan Kolasib DC hrilhin, "An ngaih pawimawh tâwk loh vang a ni a, mipui an zahloh vang a ni," an ti a; contractor-te'n sum hmuh hun an nghah kher ngai loh thu an sawi.

Kolasib MJA-te chuan, NH kawng chhia avangin Bualpui leh a chhehvel aṭanga Kolasib-a sikul kaite leh sorkar hnathawkte an chawlh a ngaih phah fo thu te, Kolasib district-ah kawng siam dawn vanga SP-in kawng khar tur thuchhuah a siam chángin a viltu an awm ngai lo a, contractor-te'n hna thawh nan an hman phah ngai lo chu veiawm an tih thu an sawi bawk.

MJA thu thlen chungchangah DC John LT Sanga chuan, a theih ang anga hma a lak tur thu sawiin, tunah chuan hna thawhna hmunah awm chilh tura a hrilh thu a hrilh a; ruahtui tlak hun leh tlak dan chu kum za tél hriat a nih tawh avangin, harsatna a awm hnuah chauh chhuanlam siam chu hriatthiam a har thu a sawi.

MJA member-te'n kawng sir bal leh lungrem ngai hlamchhiah a nih thu an sawi chungchangah Bawrhsap chuan NHIDCL hotute phone-in a be nghal a; NHIDCL hotute chuan, Bilkhawthlir, Khàmráng leh Kolasib Leitanahte retaining wall siamna atan cheng vbc. 2.5 tender an hawn mek thu an lo hrilh.

Kolasib MJA tarlan danin, NH kawngpui hi Mizoram PWD-in Bilkhawthlir Khàrzâwl leh Kolasib Leitan inkar an enkawl bak zawng chu National Highways & Infrastructure Development Corporation Limited (NHIDCL)-in an enkawl a; kawngpui chhe zual lai, lirthei leh zin mite harsatna siamtu ber, Bualpui dai Seṭhawn bul vel chu NHIDCL hnuaiah C Lalhluna, Aizawl-in a enkawl a, C Lalhluna hnuaiah hian Salome Construction-in an enkawl ve leh a ni.