Tourism Minister-in Khàmrángah Eco Tourism lungphùm a phúm

Tourism minister Robert Romawia Royte chuan nimin khan Khàmrángah Development of Village Based Eco Tourism siamna tur lungphùm a phúm.

Development of Vil-lage Based Eco Tourism siamna tur hian Ministry of Development of North Eastern Region hnuaia North East Special Infrastructure Development Scheme aṭangin cheng nuai 800 hmuh a ni a, kum hnih chhunga siam zawh tura ruahman a ni. Project hmang hian Khamrang khua, Khamrang pûk, Lungkulh, Bâk Luk Trekking, Lungkhawthlir leh Thangruma hmunte kal awlsam leh nuam zawka siam tum a ni.

Tourism Minister chuan, Mizoramin Responsible Tourist Policy a neih tawh thu sawiin, Development of Village Based Eco Tourism siam tur chu India ram pum huapa tourism lama Mizoram a lan ve theihna a nih ngei a beisei thu a sawi a, "Sorkarin tih tur hmachhawp a neihte leh tih tur a tihte chu kan Chief Minister kaihhruaina hnuaiah chak taka tihpuitlin zel a ni," a ti.

Robert Romawia chuan, Mizo hnam leh sakhua humhim chungin tourism kalpui zel a ni dawn tih sawiin, "Kan ram leh hnam tourism kaltlangin kan pho chhuak zel dawn. Responsible tourism leh village based eco tourism thil tum chu, project awmna khuaa mipuite'n hlâwkna an neih a ni," a ti a; Khamrang khua chu a hmasa ber a nih angin a hlawhtlin nan theihtawp chhuah turin a chah.

Sports Minister hian Khamrang Football Club team jersey a tlangzarh nghal a; bialtu MLA K Laldawngliana leh Tourism Development Board vice chairman TC Pachhunga te pawhin thu an sawi.