NH kawng chhia siam turin CM ngen

Mizoram Merchants Association (MIMA) chuan nimin khan PWD enkawltu chief minister Zoramthanga hnenah Khamrang leh Thingdawl báwr vela kawngpui chhe lutuk avangin bungraw phurtute'n bungraw phurh chawlhsan rih mai an duh thu an thlen a, kawng siamṭhat thuai a nih theih nan hma la turin an ngen.

MIMA hruaitute hi August 17, 2023 khan Mizorama bungrua phurtu transporter hrang hrangte nen an inkawm a, harsatnate leh thawhho dan turte an sawiho. Transporter lam chuan Khàmráng leh Thingdawl bula kawng chhe lutuk avangin bungrua a thlen har thu te, tun ang reng a nih chuan bungrua phurh loh rih mai an duh thu leh kawng chu siamṭhat thuai an duh thu an sawi a; an duhnate chu Mizoram sorkarah thlen turin MIMA an ngen.

Bungraw phurtute ngenna chu bawhzuiin MIMA hruaitute chuan tun anga kawngpui a chhiat reng chuan bungraw phurtute'n bungraw phurh chawlh rih mai an duh thu nimin khan Chief Minister hnenah an thlen a ni.

MIMA chuan, August 17, Ningani khan MNF party hruaitute'n treasurer K Vanlalauva hoin MIMA office an tlawh a, thil chi hrang hrang an sawiho tih an tarlang.

Council of Minister ṭhukhawmin Shop and Establishment Acts hman a pawm chu an duh loh hle thu leh dan chu Mizoram tan a ṭha loa an ngaih thu MIMA hruaitute chuan MNF hruaitute an lo hrilh a; anmahni kaihhnawih a nih avangin sawiho hmasak ṭhin ṭha an tih thu leh, Shop and Establishment Acts chu engti zawng maha hman an tum loh thu an sawi bawk.