Mamit dist-ah kumin chhungin TB vei mi 39 hmu chhuak tawh

Mamit District TB Forum chu an chairman VL Remliana, bawrhsap kaihhruaiin nimin khan DC conference hall-ah an ṭhukhawm. Kuminah July thla thlengin Mamit district-ah ngawr (TB) vei mi 39 hmuh chhuah a ni tih tarlan a ni.

Ṭhutkhawma tarlan danin, Mamit district-ah January-July 2023 chhungin TB vei leh vei loh endik mi 394 an awm a, chu'ng zinga mi 39 chuan TB an vei tih hmuh chhuah a ni a, mi 39 zinga paliin HIV an vei tel. TB veite'n ei tur ṭha an hmuh theihna atana thilpek an pekna programme, Nikshay Mitra hnuaiah mi 24-in thawhlawm an pe a, TB vei mi 25 hnenah thla tin ei tur ṭha pek a ni.

Meeting-ah hian, Mamit district-a TB veite enkawlnaa hmalakna hrang hrang thlirho a ni a; Nikshay Mitra hnuaia TB veite enkawlna kawnga inpe tura ngenna sorkar department hotute hnena pek an rêl. Mamit district-ah TB free village siam a nih theih nan khawtlang hruaitute thawhpuina leh thláwpna an mamawh thu an sawi bawk.