Ropeway leh skywalk chunghangah ACB-in thubuai pangngai an ziak lut

Chaltlang leh Durtlang inkara ropeway siam tur leh Sakawrhmuituai tlanga skywalk siam tur chungchangah eirukna chhuitu Anti Corruption Bureau (ACB) chuan tun hnai khan thubuai pangngai (regular case) an ziak lut.

Lokayukta chuan ropeway leh skywalk siam chungchangah complaint an dawng a, an zir chian hnuah ACB-te chhui chiang turin a hriattir. ACB chuan preliminary inquiry neiin, an report chu Loayukta-ah an thehlut a ni.

ACB-in thil dik tâwk lo hmuh chhuah an neih avangin Lokayukta chuan chiang lehzuala thil dik lo hmuh chhuah a nih theih nan regular investigation ti turin a hriattir a, ACB chuan tun hnai khan regular case an ziak lut ta a ni.

Thu dawn danin, thubuaiah hian thu zawhfiah tur leh inhnamhnawiha puh tam zawk chu state páwna awm hnam dang an nih avangin thubuai chhui chhung a rei deuh a rinawm.

Lokayukta chairman C Lalsawta chuan, dan dik loin skywalk leh ropeway siam tura rawih company-te hnenah sum pek a ni ngei tih ACB-in an hmuh chhuah thu a sawi a, "Chutih laiin, tute'n nge pe tih tarlan tel a ni lo. Tute nge dan dik loa pawisa petute leh thil dang hrang hrang chhui chiang leh turin kan ti a ni," a ti.

Tarlan tawh angin, MNF Vigilance department leh Legal Board-te chuan skywalk leh ropeway siamnaah thil dik lo a awma ngaiin November 22, 2021 khan Lokayukta-ah complaint an thehlut. December 7, 2021 khan chhui phal dilna Vigilance department-ah thehluh a ni a; Vigilance-in December 17, 2021 khan chhui phalna a tichhuak a, ACB-in December 22, 2021-ah chhui phalna an dawng.

Tourism department pawhin skywalk leh ropeway chungchang chu Director hmingin February 3, 2022 khan Lokayukta-ah an thlen. Lokayukta-in thil hrang hrang a zawh lêt zingah, rinhlelh an neih leh neih loh chungchangah, mimal/company rinhlelh tarlan an nei lo a ni.