Dr Vanlalthlana MLA Fund hman danah eirûkna a awmah MNF-in an ngai

MNF Media & Publicity department hotute chuan August 19, Inrinni khan Aizawl Press Club-ah thuthar thehdarhtute an kâwm a; Aizawl North-II bialtu MLA Dr Vanlalthlana'n a MLA fund a hman danah eirûkna, hlemhlêtna leh dan bawhchhiatna a inphûm ngeiah MNF-in an ngaih thu an sawi.

MNF general secretary VL Krosshnehzova chuan, Dr Vanlalthlana'n August 11, 2023 khan, 'Corruption do turin kan inpeih tawh a, a ngaihna pawh hre turah kan inngai,' tiin ZPM pisaah a sawi thu a sawi a, "Hetianga huai taka a sawi mek lai hian Dr Vanlalthlana hian a MLA fund a hman danah eirûkna leh hlemhlêtna mai bakah, dan bawh­chhiatna a inphûm ngeiah MNF chuan kan ngai," a ti.

VL Krosshnehzova chuan, Dr Vanlalthlana'n a MLA fund chu local council (LC)-te kutah a dah mang lo nia sawiin, "LC-te kuta a dah chhun pawh ZPM unit leh ṭhalaite’n an thawk tlangpui. MLA fund party-in an thawh phal a nih loh laiin ZPM party deuh hlir a thawh tir a, Aizawl North Development Agency din chawpin party mite a vûr hem hem mai," a ti a; ZPM block hruaitute leh agency din chawp hmanga hna an thawh ṭhenkhat chu sum sèn zat nen a inphû lo hlawm hle niin a sawi.

Ramhlun North ZPM Unit-II president C Lalmalsawma'n, "Keiniah chuan cheng khat pawh hi mimal account-ah a luh belh lo a, party-te'n kan party tihchak nan kan hmang ve a, chu zawng chu a ni mai e,' tiin Whatsapp-ah a post nia sawiin Krosshnehzova chuan, "Hei hian dan phal lohin MLA hian ZPM unit hi MLA fund a pe ngei tih a lantir chiang hle," a ti.

MNF Media & Publicity chuan ZPM chu kalphung thar, mipui sorkar an zawrh chu anmahni'n an bawhchhia nia sawiin, "Social media-a an chakna hmang hian ṭhalai leh mipui an bum mek zel a ni," an ti a; an chet danah kalphung thar ṭha lam a awm lo niin an sawi.

VL Krosshnehzova chuan, Mizorama sorkar tawhte chu thil ṭha ti duh rêng rêng lo angin ZPM hoin an sawi ṭhin niin a sawi. Sorkar tawhte thil ṭha ti duh rêng rêng lo anga sawitu press mite zawhna chhángin, "Sailova'n chhe vek angin min sawi, sala táng angin min sawi a, chu chu chhe vek ang chu a ni mai lo a mi?" an ti.

MLA dangte'n MLA fund an hman dan chung­changa zawhna chhángin MNF Media hotute chuan, "ZPM-te kan sawi ang hian kan MLA-te an felfai vek kan ti rêng rêng lo," an ti a; MNF MLA-te chu 100%-in an dik tia an ṭan ngam loh thu an sawi bawk.

MNF-in VANLALTHLANA AN ZAWHNATE

1. MLA fund thawk tura implementing agency atana a hman NGO emaw LC-te emaw hian hna tak tak hi an thawk ngai lo em ni? Tute nge a hna tak tak thawk ṭhin? Tu nge a hlâwkna tél thin?

2. Eng vangin nge implementing agency ni chunga seal hman man hi an lak? Tu hnen aṭangin nge an lak a, tuin nge pawisa chu pe?

3. Seal hman man latu NGO leh LC-te hi tute nge?

4. ZPM unit president sawi aṭang khian, implementing agency-a MLA-in a hman ṭhinte hian hna hi thawk loin ZPM unit hlir a thawhtir ṭhin zawk a ni em?