CM-in FMGEW a kâwm dawn

Sorkara thil phût an neih vanga kar hmasaa lungawi lohna lantirtu Federation of Mizoram Government Employee & Workers (FMGEW) hruaitute chu vawiin hian chief minister Zoramthanga'n a kâwm dawn.

Tarlan tawh angin, FMGEW thutlukna angin sorkar hnathawkte chuan August 17-18, 2023 khan badge dum an bel a, sorkar aṭanga an beisei ang thu lawmawm an hmu lo a nih chuan naktuk August 22 hian an kal zel dan tur rêl an tum a ni.

FMGEW hruaitute hnen aṭanga thu dawn danin, Chief Minister-in a sàwm angin vawiin chawhma dar 10 hian an inbe dawn a, an inkawmna azirin an kal zel dan tur chu an ngaihtuah leh ang.

Sorkar hnathawkte'n badge dum an bel chhan ber chu, danin a sawi anga dearness allowance pek a ni a, dan anga pe turin Mizoram sorkar an phût. Badge dum bel chungchanga tun hnaia thuchhuah an siamah, DA chungchang sawipui tura Chief Minister an ngenin awmzia a nei thei lo tih an tarlang a ni.