Mamitah bandh huaihawt dawn

Mamit Truck Owner Association (MTOA) chuan kawngpui leh lei siamṭhat an phût a, an thil phût tihlawhtling tura sorkar kar nan vawiin hian Mamit khawpuiah total bandh an huaihawt dawn.

MTOA chuan total bandh hi zing dar 6 aṭangin an huaihawt dawn a, tiamchin awm lo tur a ni. Mamit khawpui chhungah hmun hnih leh Zawlnuam, Zamuang leh Dapchhuahah hmun khat ṭheuhah duty indah an tum.

Dárlâk leh Bâwngvâ inkar Teirei lei (bailey bridge) motor lian full load-in a zawh theih tura siam te, NH-44A Dârlâk-Tuidam thawm ṭhat te, NH Tuidam kawngpuia lirthei lian tlan phalsak leh, Mamit-Bairabi kawng thawm ṭhatte MTOA chuan an phût a ni.