Hmun hnihah kuhva rah man

Hachhek Bial Kuhva Chingtu Pawl (HBKCP)hma­laknaa kuhva tawlhrûk tur vengtute chuan August 19, Inrinni zan leh nimin zing khan kuhva rah an man.

HBKCP hruaitute hnen aṭanga Vanglaini thu dawn danin, kuhva rah tawlhruk tur vengtute chuan an thu dawn bawhzuiin Inrinni zan khan Aizawl-Zawlnuam maxicab pakhat, Zawlnuam lam pana tlân chu an tiding a, kuhva rah hmu chhuakin an man a ni. Kuhva rah chu airbag-ah dah a ni a, ip hnih vel a nih an ring.

Kuhva rah phurhna maxicab chu a chhe lai a awm nual a, a ke a thêp vek avangin he thu ziah lai thleng hian a la tlân thei lo.

Nimin zing khan pick-up (Tata Yodha) pakhat chu Tuidama kuhva rah chíngtu duty-te an inthlâk lai, zing dar 9 velah Tuidam aṭanga Tripura lam panna kawngah a tlân tlang a, ûm zui nghal a ni. Kuhva rah chíngtute chuan Tumpangluiah nang­chingin, kuhva rah phurhte chu an man. Kuhva rahte chu a hnuah a kâng vek a, lirthei leh a khalhtu chu police-in an la thung.