MLA-in Kawlkulh North HCC a hawng

Human Resource Development Board vice chairman Dr L Thangmawia, MLA chuan August 19, Inrinni khan a bial chhunga Kawlkulh North Health Clinic Centre (HCC) a hawng. MLA hian HCC thara thawk tur health worker leh 4th grade pakhat ve ve MLA fund hmangin a ruai nghal a ni.

Dr L Thangmawia chuan, Lengteng biala sub-centre awm lohna khua zawng zawngah HCC hawn a ni ta chu thil chhinchhiah tlak a ni tih sawiin, "Khawtlang hruaitute leh MLA-in an dilna ngai pawimawha HCC hawnsaktu Health department chungah lawmthu Lengteng bial mipuite'n kan sawi a ni," a ti.

HRD Board Vice Chairman chuan, MNF sorkar kum nga la tling lo deuh chhungin khaw 200 chuangah HCC hawn thar a nih thu te, Health department bikah in 146 lai (district hospital pathum, CMO office panga, PHC 21, sub-centre 63, thawktu quarters 35 leh isolation ward 19) sak zawh a nih thu leh sak mek leh sak ṭan tur tam tak a awm thu te, doctor 45 leh nurse 23 a ngheta lak a nih thu te, a nghet loa thawk tur health & wellness officer 276 leh nurse 25 lak a nih thu te, SEDP hnuaiah health worker 568 lak a nih thute a sawi.

Kawlkulh North HCC atan hian Kawlkulh PHC staff quarters hman rih a ni a, bungraw mamawhte chu MLA fund hmanga lei a ni. Health worker Vanlalhruaii leh 4th grade Lawmzeli te MLA fund hmanga rawih nghal a ni bawk.