CM-in Luangmual khelmual tihchangtlun dan tur a enfiah

Chief minister Zoramthanga chuan August 19, Inrinni khan Luangmual khawtlangin an veng thlànmual panna kawng siamṭhat leh khelmual tihchangtlun an dil leh, SEDP hmanga veng chhung kawng siam tharte a enfiah.

CM Zoramthanga chuan, Luangmual khawtlang mamawhte chu sorkarin a ngaihtuahsak dawn tih sawiin, "A ṭul angin a changtu department-te'n an rawn en zui nghal ang. Chutihlaiin, kan hriat angin inthlan hmachhawn mai tawh tur kan ni a, tun maia han chinfel nghal a theih a ni tawh rih lo a, Pathian zarah sorkar tharah hun ṭhate kan nei leh a nih chuan kan bawhzui thuai thei turah ka ngai," a ti.

Chief Minister hi bialtu MLA Zothantluanga, MLA Lalrintluanga Sailo leh Luangmual khawtlang hruaitute'n an ṭawiawm a ni.