Zirtirtu pahnih sawn chhuah duh loin T Romana College zirlaite pungkhawm

T Romana College Students Union (SU) chuan an college-a zirtirtu pahnih, thlaktu awm loa sawn chhuahna thupek chhuah an nih an duh lohzia lantir nan nimin khan Secretariat bulah sit-in protest a huaihawt a, zirlai ṭhahnem tak an pungkhawm a; thuziak chi hrang hrang an tarlang.

T Romana College zirlaite an punkhawm lai hian SU hruaitute leh sorkar aiawhte chu an inbia a; T Romana College SU hruaitute bakah Aizawl City College Joint Students Union hruaitute an tel a, sorkar aiawhin Higher & Technical Education (HTE) department Secretary, Additional Secretary leh HTE Minister PS-te an tel.

Inbiaknaah hian sorkar aiawhte chuan, T Romana College-a zirtirtu pahnih transfer chungchang chu HTE Minister zin haw hun kar leh lamah ngaihtuah tur leh T Romana College-a an awm zui theih nan hma an lak tur thu an sawi avangin zirlaite chuan chawhnu dar 2-ah sit-in protest chu an titawp a ni.

T Romana College SU chuan, an duh anga an zirtirtu pahnihte an college-ah sorkarin a dah lêt emaw, an aiawh tur dah emaw a nih loh chuan January 21, Thawhlehni-ah class kal loin, na zawka hmalak an rel thu an tarlang.