Lamka-ah kawngzawhpui huaihawt dawn

Kuki Students' Organisation leh an thurualpui zirlai pawl dangte chuan August 29, 2023 khian Lamka-ah kawngzawhpui (mass rally) huaihawt an tum a, hei hi Zomi Council Steering Committee (ZCSC) chuan an thlâwp thu an tarlang.

ZCSC tarlan danin, mass rally huaihawt tur chu Union Home Minister-in Manipur-a Mizote chungchang dik lo taka a sawi vang leh an duh leh ngaihtuahnate sawi chhuak lo tura sorkarin khapbeh a tum dodalna tur a ni.

Manipur buaina inṭan aṭangin ni 100 a liam tawh tih sawiin ZCSC chuan, "Dan rorelna awm mumal thei loin sorkar kut leh ke zawng zawngte pawh hnam lian zawkin a tê zawk an nawr chêpnaah an ṭangho a ni," an ti a;

remna leh muanna tluantling awm theihna tur Zo fate tana inrêlbawlna hran pek chauh a nih thu sawiin, "Chu pawh chu inlungrual leh huapzo taka tih a nih chauhin a hlawhtling ang," an ti.

ZCSC chuan, Manipur buaina kaihhnawihah Zo fate'n FIR 7000 chuang an thehlut tawh a, mahse ngaihsak a ni lo tih sawiin, "Chief Minister-in FIR 6,000 chuang chinfel tawh anga a sawi hi rin loh bak chu tih dan tur a awm hlawl lo," an ti a; Manipur High Court Bar Association pawhin ualau takin thlàwp bik an neih thu an tarlang.