Leilung leh a chhunga awmte humhalh chungchang sawiho

Centre for Environ-ment and Social Justice (CESJ), Mizoram chuan August 19, Inrinni khan Central YMA Committee Room-ah 'Forest Conservation leh Biological Diversity Amend-ment Act 2023 hnuaiah Article 371G hian min hum thei em?' tih thupui zirhona an buatsaih.

Zirhona hi CESJ adviser Dr Laldinpuia'n a kaihruai a, CESJ working chairman Vanramchhuangi'n zirhona buatsaih chhan a sawi. Mizoram chief conservator of forest hlui Lalthlamuana Pachuau-in Forest Conservation Amendment Act, 2023 a sawi a, Jawahar Nehru University, New Delhi-a thawk Dr Joseph Lalfakzuala'n Indian Constitution Article 371G a sawifiah bawk.

Legal adviser to chief minister C Lalramzauva chuan, August 22-23, 2023 chhunga Mizoram Legislative Assembly ṭhutkhawmah Forest Conservation leh Biological Diversity Amendment Act, 2023 chungchangah Article 371G tlawhchhanin resolution siam an tum thu a sawi.

ZIRHONAA RESOLUTION

1. Adviser to Chief Minister chuan Assembly-ah The Forest (Conservation) Amendment Act 2023 leh Biological diversity (Amendment) Act 2023 hi Mizoramah kan hman ve loh nan Mizoram State Legislative Assembly-ah pawm loh tur thu put luh an tum thu a sawi hi lawmawm kan ti hle.

2. The Forest (Conservation) Amendment Act 2023 leh Biological Diversity (Amendment) Act 2023 chungchangah Mizoram humhim a nih theih nan a ṭul ang zela kohhran, civil society leh sorkar ṭanghoa hmalak ni rawh se.