KHAWTHLIR

CWC member atan Lal Thanhawla ruat

All India Congress Committee president Mallikarjan Kharge chuan Congress Working Committee member turte a ruat thar a, Mizorama hun rei tak Congress party president ni tawh Lal Thanhawla a tel. Congress president Kharge hian CWC member ruatna hi nimin khan a tichhuak a, mi 30 ruat niin, Lal Thanhawla hi 12-naah ziah a ni.

Minister-in enfiah

Rural Development minister Lalruatkima chuan August 19, Inrinni zing khan Sateek Wholesale Market-cum-Guest House a tlawh a, tun hnai ruahsûr vanga in bulṭhuta leiminin harsatna a thlente a enfiah. Minister chuan department-a thawktute chu in dinhmun kimchang report kar tina siama pe ṭhin turin a chah a ni.

Hnathawh thlir lêt

Excise & Narcotic department hotute chuan an minister Lalrinawma hoin August 19, Inrinni khan thla khat chhunga an hnathawh an thlirlêt. Minister chuan, ruihhlo donaa theihtawp chhuahpui ṭhintu pawlte chungah lawmthu sawiin, "Kan ram ṭhenawm buaina vanga Mizoram rawn pante leh awm mekte pawh ruihhlo tawlhnaa inhnamhnawih lo tur leh ruihhlo donaa thawktute ṭanpuitu ni zawk turin ka sáwm a ni," a ti.

Zirlai lawmpui

Tuichangral Zirlai Pawl chuan August 19, Inrinni khan Aijal Club-ah zirlai tharte lawmna leh zirlai ti ṭhate lawmpuina an buatsaih a, Home minister Lalchamliana'n a hmanpui. Kumina HSLC, HSSLC, under graduate leh a tlukpui exam-a Tuichangral aṭanga zirlai hlawhtling te, UPSC leh MPSC prelims exam paltlangte leh State Teacher Award 2023 dawngtute hnenah chawimawina an hlan a ni.

CM-in tlawh

August 18, 2023 tlai dar 5 vela Zemabawk Bethel Veng, Mitlamual panna kawnga KC Zauva te chenna in, Assam type leiminin a hnâwl chu August 19, Inrinni khan bialtu MLA Zoramthanga, chief minister-in a tlawh. Chief Minister chuan, "A hmunhma sak leh theihin han thian se, a ṭul ang zelin kan inpui dawn nia," a ti a; in senghawia hnatlangte ei leh in senso atan Zema-bawk West Branch YMA hnenah Rs 5,000 a hlân.