Mizoramin CAPF hmanga Tangkhangte hruai a rawt
Home secretary Lalbiaksangi chuan Ministry of Home Affairs (MHA) Joint Secretary (NE) hnenah Ningani khan lehkha thawnin, Assam leh Mizoram sorkarin Assam-a Mizoram lirthei tángte central armed police force (CAPF) venhimna hnuaia hruai chhuah rawtna a thlen. He thu ziah lai thleng hian MHA aṭangin chhanna an la dawng lo.
Ministry of Home Affairs aṭangin chhanna dawn a la ni lo.
Mizoram Home Secretary hian MHA hnena lehkha a thawnah hian, Silchar Trucks' Driver Union (STDU) leh Zoram Drivers' Union (ZDU) chuan Mizoram leh Assam sorkar chu an state chhung ve vea lirthei tangkhangte CAPF-te venna hnuaiah an kalna tur lamah kaltir ni se an duh thu an thlen tih a tarlang.
MHA hnenah hian Home Secretary chuan, Mizoram sorkar chuan CAPF-te venhimna hnuaiah Mizorama lirthei táng mekte chu ramri thleng him taka an thlen theih tur thu a tarlang a, "Assam lam pawhin CAPF vènna hnuaiah an state chhunga lirthei tángte, Silchar Mizoram House-a mite tiamin rawn hruai kîr ve se," a ti.
Vanglaini palai zawhna chhangin Home Secretary chuan, MHA aṭangin chhanna an la dawn loh thu a sawi a, "Thil ṭul ang angte kan buaipui chhunzawm zel," a ti.
Vanglaini palai zawhna chhanga ZDU hruaitute sawi danin, STDU leh ZDU chuan CAPF hmanga lirthei tángte hruai chhuah an duh thu an awmna state chief minister leh chief secretary ve ve hnenah ziakin an thlen a, mahse, chhanna an la dawng lo ve ve a ni.