Assam-a kawngpui dan avangin Ukilte'n PIL thehluh an tintuah

Mizoram BAR Asso­ciation (MBA) chuan, Mizoramin ei leh in a lâk luhna kawngpui National Highway dan pin reng a nih avangin Gauhati High Court (GHC), Aizawl Bench-ah PIL thehluh an tintuah.

Vanglaini palai zawhna chhangin MBA general secretary R Lalhmingmawia chuan, PIL thehluh hmain Ministry of Home Affiars (MHA) Secretary hnena kawng dan vanga harsatna thlen dan leh a kaihhnawihte an thehlut phawt dawn tih a sawi a, "Hei hi a rang lamin kan thehlut ang," a ti.

MHA Secretary hnena an thil thehluhin awmzia a neih loh chuan hma an lak chhunzawm tur thu sawiin R Lalhmingmawia chuan, "Hmalakna a awm loh chuan PIL hi kan thehlut ang," a ti a, PIL a ṭul a nih pawhin thehluh hun tur chu committee-in a rel tur thu a sawi.

MBA hian nimin khan hriat­tirna ti­chhuakin, Vairengte dáiah NH kawngpui chu hun eng emaw chen dan pin a nih tawh thu an tarlang a, "Hetia NH-54 dan pin reng hi ṭha kan ti lo a, GHC, Aizawl Bench-ah MBA hminga PIL file ni se kan ti a ni," an ti. A ṭul anga hma la turin an member aṭangin mi pali an ruat nghal.

An thurel bawhzui tura an ruatte chu convener atan Anil Rinliana Maholtra a ni a, member-te chu B Lalramenga, Lalfakawma leh Joseph L Renthlei te an ni.