MNF party-in Lalduhoma an chháng

MNF party chuan nimin khan thuchhuah siamin, ZPM Legislature Party leader Lalduhoma'n November 5, Ningania press conference-a a sawite an chháng a; MNF chuan ramri hralh chu sawi loh, a hralh dan tur pawh an hre lo tih an tarlang.

Lalduhoma'n press conference-ah, MNF party chu Assam-a BJP an sorkar nawn theihna tura ramri hralh ta hiala an ngaih thu a sawi tih tarlangin MNF chuan, "Dâwt sawi ṭhang, mám taka engkim sawi ṭhin Pu Duhawma hian ram hruai tuma a zinkawng tiawihawm ṭhintu atana a hmanraw pui ber, dâwt pawh a sawi rinawm thiam ta lo. Tunah chuan naupang inhnial tlâwm hreh laklawh, a bawplawka thu la ang lek lekin thu a phuhchhuak ve ṭan ta," an ti.

MNF chuan, "Hetianga sorkar puh hmingchhiat a duh rau rau a nih chuan, awihawm deuh zawk thil dang phuah nacháng hria se a ṭha zawk tur," an ti a; MNF chuan ramri hralh chu sawi loh, a hralh dan tur pawh an hre lo niin an tarlang a ni.

Political party-te leh mimalin ramri hralh lam hawiin thu an la sawi ngai lo nia sawiin MNF chuan, "Ngaihtuah pawh an ngaihtuah chhin ngamin a rinawm loh. Heti chunga Pu Duhoma'n ramri hralh ti zawnga a sawi duh tâkah hi chuan, ramri hralh dan pawh a hretu awmchhun a lo nih reng a rinawm ta hial a, ram rorèlna chang ve ta pawh ni se, ramri hralh a tum mai ang tih a hlauhawm hle," an ti. ZPM pawh thu dik lo hmanga mipui bum duh party-ah a chhuah thuai an rin thu an sawi bawk.