Sorkarin MR bill nuai 6157.49 a ba mek; March 2022 thlenga bill lut pek a ni tawh

Mizoram State Health Care Scheme (MSHCS) hnuaiah March 2022 thlenga damlo inenkawlna senso (bill) lut ṭhenkhatte sorkarin a pe tawh a, August 15, 2023 thleng khan bill la pek loh cheng nuai 6,157.49 a awm.

Vanglaini-in RTI Act tlawhchhana a zawhna MSHCS SPIO-in a chhàn danin, August 15, 2023 thleng khan MSHCS chuan March 2022 thlenga damdawi-ina inenkawlna bill an dawnte an pe tawh a; bill la pek loh mi 19,321 awmin, bill la pek lohte chu October 2021-March 2022 leh August 15, 2023 inkara an dawnte a ni. Bill la pek loh zawng zawng chu Rs 61,57,49,824 a tling.

MSHCS SPIO tarlan danin, sorkar kum 2023-24 kal mekah August 15, 2023 thlengin Mizoram sorkarin MSHCS hnenah damlote bill atan ṭum thum pawisa a pe tawh a, a vaiin Rs 28,00,00,000 (nuai 2,800) a ni. Sorkarin MSHCS hnena bill a pek dan chu, April 27, 2023-ah Rs 4,00,00,000, July 5-ah Rs 20,00,00,000 leh August 1-ah Rs 4,00,00,000 a ni.

Mizoram sorkar aṭanga sum an hmuh tawh an la kawl zat zawhna August 15, 2023 dinhmun anga MSHCS SPIO-in a chhan dan chuan, "Health Care bill pekna atana sum kan dawn hi kan dawn veleh bill pek chhuah nan hman ral nghal zel a ni a, tun dinhmunah health care bill pek tur pawisa eng zat mah kan nei lo," a ti.

MSHCS policy hi kum 2022 aṭangin sorkar kum chhiar dan (April-March) anga kalpui ṭan a ni a, a hma lam zawng chuan October aṭanga a kum leh September thleng atan kalpui a ni ṭhin.

October 2020 - September 2021 chhung khan mi 29,296-in bill an thehlut a, chu'ng zinga 646 chu hnâwl (reject) a ni. Bill pawmsak mi 28,650-te'n inenkawlna senso an dil zat chu Rs 76,84,90,046 niin, pek vek an ni tawh.

August 15, 2023 dinhmun angin, October 2021 - March 2022 chhungin bill pawmsak mi 12,896 awmin, pawisain Rs 34,17,67,835 a ni a, bill hnawlsak mi 372 an awm. Bill pawm 12,896 zinga mi 11,389-te inenkawlna senso Rs 29,81,65,415 chu pek tawh a ni a, la pek loh mi 1,498 (Rs 4,36,02,420) an la awm.

Sorkar kum liam ta April 2022 - March 2023 chhung khan mi 15,513-in bill an thehlut a, chu'ng zinga mi 15,195 (Rs 47,84,18,444) chu pawm niin, mi 318-te bill hnâwl a ni.

Sorkar kum kal mekah April 1, 2023 aṭanga August 15, 2023 thlengin mi 2,640-in bill an thehlut tawh a, chu'ng zinga 12 chu hnâwl niin, mi 2,628-te bill Rs 9,37,28,960 pawm a ni. April 2022 hnu lama bill lut tawh zawng zawng chu pek a la ni lo.

Bill la pek loh zingah October 2021 - March 2022 chhunga thehluhte pawh a tel a, chu'ngte nen chuan bill lut tawh leh pawm tawh August 15, 2023 thlenga la pek chhuah loh chu mi 19,321 an ni a, Rs 61,57,49,824 a ni.