Meidum-Hortoki kawng chungchangah Lokayukta-ah Congress party an zualko: 'Ṭul loah cheng nuai 17,811 hman a ni' - MPCC

Mizoram Pradesh Congress Committee (MPCC) Vigilance Cell chuan Meidum leh Hortoki inkar kawng laihnaah ṭul loa mipui sum nuai 17,811 hman a ni-ah an ngai a, chhui chian a nih theih nan nimin khan Lokayukta-ah ziakin an thlen.

Lokayukta-a an zualko hnuah MPCC Vigilance Cell chuan Aizawl Press Club-ah thuthar thehdarhtute an kâwm a, an chairman Lalrindika Ralte, MLA chuan, Meidum-Hortoki kawng laihnaah sorkarin sum tam tak a hman avangin an en zui a, ngun taka an zir chian thu a sawi.

Lalrindika Ralte chuan, Hortoki khaw chhehvelah ONGC-in lei chhungril an zir chiang a, chumi atan chuan khawl leh lirthei lian tak tak lak luh a ngaih avangin Meidum-Hortoki kawng chu laih a nih thu RTI Act hmanga zawhna chhannaah tarlan a ni tih a sawi a, "A thawh khatnaah cheng nuai 4,445 sanction a ni a, contractor chu RV Hluna, Edenthar, Aizawl a ni," a ti.

Thawh hnihna (Phase-II)-ah cheng nuai 13,366 pek chhuah a nih thu sawiin Lalrindika chuan, "RTI Act zawhna sorkarin a chhannaa a lan dan chuan, hna hi a bika thawh ngai chi hna a nih avangin registered contractor nazawngin an thawk thei lo a, restricted tender hmangin contractor ṭha leh thiam bikte thlan an ni, tih a ni," a ti a; con­tractor an thlante chu contractor dangte aia thiamna bik nei an nih an hriat loh thu a sawi.

MPCC Vigilance Cell tarlan danin, Mizoram sorkarin Meidum-Hortoki kawng laih a ṭul thu leh a chhan a tar­lan laiin, ONGC aṭanga thu an dawn dan leh document an neiha a lan dan chuan ONGC hian Meidum-Hortoki vela oil/gas zawn hna an thawh chu October 7, 2015 khan an chhuahsan tawh a, an bungruate pawh ONGC forward base, Srikona, Silchar-ah an dah vek tawh a ni.

Directorate of Geology & Mining Annual Report 2022-23-a a lan danin, ONGC hian Mizoram sorkarah petroleum exploration license fee a pe tawh lo tih a chiang a, Mizorama oil/gas zawn hna chu an tàwpsan tawh tih a tichianga ngaih theih a ni. Oil/gas zawng chhunzawm leh tur chuan Directorate General of Hydrocarbons (DGH), Noida aṭangin phalna neih a ngai a, vawiin thlengin phalna an la nei lo.

ONGC ang company lian tan an mamawh a nih chuan kawngpui siam chu thil har a ni lo tih sawiin MPCC Vigilance Cell hotute chuan, "Civil engineer leh technical lamah pawh keini state aia theihna nei sang zawk an ni. A tichiangtu chu kum 1992 vel khan Phaisenah ONGC hian lei verh an duh a, lei verh an duhna hmun thlenga a fùr a ṭhála truck kal theihna tur kawng siam nan Mizoram PWD-ah sum mamawh zat tur an rawn zawt daih tawh," an ti.

MPCC Vigilance Cell chuan, "Kan ram sum leh pai dinhmun a chhiat em em lai leh sorkar hnathawkte pawhin hlawh an lâk mumal theih loh lai leh, mirethei damlo inenkawlna bill tak ngial pawh sorkarin a batsak laia mahni hmasial nan leh mimal induhsak nana mipui sum heti zat hman ral a ni hian kan rilru a tiná a ni," an ti a; mawhphurtu man chhuah an nih a, dan hmanga hrem an nih ngei theihna atan a tàwp thlenga hmalak an tum thu an sawi bawk.