Zirtirtu aikal la bàn turin MHZP-in sorkar an ngen
Mizo Hindi Zirlai Pawl (MHZP) chuan Saitual district-a Làmherh Secondary School (RMSA)-a Hindi zirtirtu aikal la mek Sairengpuii Sailo chu a hna aṭanga August 2023 chhung ngeia bàn turin sorkar an ngen.
MHZP chuan, Mizoramin Hindi zirnaah rahbi thar a rah mek thu an tarlang a, "High school leh middle school Hindi teacher (centrally sponsored scheme) agreement sl.no 12. (iv) ngai pawimawh loa aikal la luite chungah sorkar hian huai takin an hna aṭanga bàn (terminate) thleng pawha action la turin kan ngenin kan phût nghal a ni," an ti.
Lamherh H/S (RMSA)-a Hindi zirtirtu atana lak, SDEO pensioner rawih nawn leh chuan appointment a hmuh aṭanga tun thlengin aikal a lâk thu tarlangin MHZP chuan, "Sorkar chuan insawifiah turin explanation a call tawh bakah, August 4, 2023 hma ngeia show cause notice chháng tura hun pek a ni. Heti chung hian Sairengpuii Sailo hian transfer a la dil tho nia hriat a la ni leh zel a, amah ruaitu sorkar leh department a zahlo mai ni loin, engahmah a ngai loah kan a ngai," an ti a; August 2023 chhung ngeia bàn turin sorkar an ngen a ni.
MHZP chuan, an thil phût chungchangah sorkar aṭangin chanchin lawmawm hriat tur a awm loh chuan Sairengpuii Sailo thawhna khua VEC-te nen ṭangrualin, a ṭul a nih chuan sikul khàr thlenga hmalak a nih tur thu an puang.
Englai mahin aikal lâk an pawmpui ngai lo tih sawiin MHZP chuan, "Rinawm leh taima taka mahni thawhnaa awmte an chhuanawm kan ti hle. Aikal late hian an agreement ber an bawhchhiat ngam chuan MHZP chuan a en zui ang a, a ṭul angin hma a la ngam a, hma a la ngei dawn a ni," an ti a; sorkar hmalakna an thlir reng dawn thu an tarlang.