HIV vei hmuh chhuah a pung zel

Aizawl district-ah kum 15-35 inkar HIV vei hmuh chhuah an pung zel a, mipa mahni anpui kawp vanga HIV vei an pun mek bawk.

Nimin khan Aizawl District AIDS Prevention Control Committee (DAPCC) chu an chairman Nazuk Kumar, bawrhsap kaihhruaiin DC conference hall-ah an ṭhukhawm. Tarlan danin, Aizawl district-ah kum 15-35 inkarah HIV vei hmuh chhuah an pung zel a, HIV vei zingah mipat hmeichhiatna aṭanga inkai chhâwng an la tam ber. Mipa, mahni anpui kawp vanga HIV vei an pung tial tial zel a, nu leh pa aṭanga naupanga inkai chhâwn pawhin tlem lam a la pan lo.

Ṭhutkhawmah hian HIV/AIDS kái lo tura nun dan ṭha leh thianghlim inzirtirna neih tam a pawimawh thu an sawi a; Vertical Transmission of HIV & Syphilis chungchang leh hmalakna hnuaia hmeichhia leh naupangte HIV leh Syphilis (saihri) laka an fihlim theihna tura ruahmanna siam leh kalpui dante tarlan a ni.

Aizawl district-a sikul hrang hranga pawl 8, 9 leh 11 zirlaite tan HIV/AIDS chungchang intihsiakna Red Ribbon Quiz buatsaih dan tur an sawiho bawk. Quiz hi district, state leh regional level-ah buatsaih a ni dawn a, state-a pakhatna chu India ram pum intihsiakah Mizoram aiawhin an tel dawn a ni.