Kan sorkar chuan buhhûm kan lei dawn - Lalduhoma

ZPM leader Lalduhoma chuan, ZPM an sorkar chuan buhhûm lei a, Pangbalkawna a hêrna khawlah a faia herh chhuah an tum thu a sawi rualin, sorkar leibáin a delh rih dawn êm avangin hmalak nghal a har theih thu a sawi a; eng páwl pawh ni se, mi tumruh leh taima tan kawng a inhawng dawn niin a sawi bawk.

Lalduhoma hian nimin khan an party pisaa inkhawmah thu sawiin, Mizorama buh tharte hmanga eng emaw chen state mamawh phuhru tura ṭan lak a ngaih thu a sawi a, "Keini chuan buh hûmin kan lei ang a, chu chu Pangbalkawna a herna khawlah kan dah ang a, kháwl neitu leh FCI nen MoU ziakin hma kan la ang. Kan sorkar kumah kan ti nghal vut vut thei ang em a hriat loh a, leibáin min delh rih dawn êm avangin hmalak nghal a har mai thei," a ti.

Buhhûm an leì a, Mizoramah her a nih chuan loneitute tan káwl a êng dawn nia sawiin Duhoma chuan, "Minimum support price kan tihchian hunah sawhthing ang chiahin buh lamah pawh hma kan la dawn a, lei lehna power tiller, buh phunna khawlte leh hlo thlawhna kháwl thlengin chak zawk leh hlâwk zawka hmalak kan tum dawn," a ti a; sorkarin leiba a ngah avangin ti nghal thei lo mah se, thapui thawhin hma an la nghal dawn tih a sawi.

ZPM Leader-in Economic Survey 2022-23 report a sawi chhàwn danin, kum khata Mizorama buh thar zat chu matric ton 62,182 a ni a, chu chu Mizoram mamawh zat aṭangin 34% vel a ni.

Lalduhoma chuan, an sorkar a nih pawhin leiba tam tak an chhawm dawn tih sawiin, "Chuti chung chuan kan sum neih ang angin kum khatnaah thlai pali kan lei dawn a, a rate tur kan puang vek tawh. Support price ngai zat tur pawh kan mithiamte'n an chhût chhuak tawh. Thlai pali bakah hian Mizote'n kan thar ve reng, sawngbawlna kan neih loh vanga sum tam tak kal ral ṭhinna kuhva leh pánhnaha sum chhuakte Mizo iptêah a tam thei ang ber kan luhtir dawn a ni," a ti.

Kuhvaah vai hoin Mizoram aṭangin kum khatah cheng nuai 6,600 vel an rût ṭhin nia sawiin Duhoma chuan, "A uiawm tham hle. Kuhva kan ei nasat avangin intodelh dan dap a ngai a, thlai dang nen hlâwk zawka chîn pawlh dan kan ngaihtuah a ngai. Chuta tan chuan farmer producer society kan din vek ang," a ti a; Mizoramah kuhva skop siamna din an tum thu a sawi.

ZPM Leader chuan, Bawngkawn leh Zarkawtah kar tin pánhnah phur truck pakua a thleng ṭhin tih sawiin, "Kar khata kan ei ral hi cheng nuai 36 man vel a ni a, thla khatah cheng nuai 144, kum khatah cheng vbc. 17 man vel a ni. Pánhnahah Kan intodelh ve a ngai a, sorkar chakna nena kan beih chuan kan hlawhtlling thei ngei ang," a ti.