Mamit district-ah kawngpui dan a ni

Mamit Truck Owner Association (MTOA) chuan an district-a kawngpui leh lei siamṭhat an phût a, an thil phût tihlawhtling tura sorkar kar nan nimin khan Mamit district-a kawngpui ṭhenkhatte an dang.

MTOA hian Dárlâk leh Bâwngvâ inkar Teirei lei (bailey bridge) motor lian full load-in a zawh theih tura siam te, NH-44A Dârlâk-Tuidam thawm ṭhat te, NH Tuidam kawngpuia lirthei lian tlan phalsak leh, Mamit-Bairabi kawng thawm ṭhatte an phût a ni.

An thil phût tihlawhtling tura sorkar kar nan MTOA chuan nimin khan kawngpui an dang a, total bandh erawh an huaihawt lo. Kawngpui an dan chu, Mamit-Bairabi te, Zamuang-Bairabi leh Dapchhuah-West Phaileng inkarte a ni.

MTOA thil phût chungchangah hian Mizoram PWD chuan nimin khan thuchhuah an siam a; NH-44A kawngpui siamtu contractor Gayatri Project-te contract tihtawp a ni a, hna la thawh zawh loh thawktu tur thlan nan tender chhuah nawn tura hmalak mek a nih thu an tarlang.

Mizoram PWD chuan, NH-44A kawngpuia harsatna thleng ṭhin MTOA-te'n an sawi chu pawi an tih thu an tarlang a, "He highway siamtu Gayatri Project chuan sum harsatna an tawh avangin duh angin hna an thawk chhunzawm hlei thei lo a, Ministry (MoRTH) pawhin an contract titawp turin tun hnaiah Mizoram PWD a rawn hriattir a ni," an ti.

MIZORAM PWD SAWIFIAHNA

▶ Darlak leh Bawngva inkara bailey bridge hman mek hi a hlui tawh a, motor lian full load tan zawh ngam a nih loh avangin load restriction siamin a zawh tawk metric ton 12 chin tan zawh phal a ni. Lei siamṭha turin hmalak mek a ni a, lei awm sa hi nawr chhuaha rem khawm ṭhat leh tur a ni. Hei vang hian lei siamṭhat chhunga lirthei tlânna tur kawng hran (diversion) neih a ngai. Ṭhál lai, tui tlèm laia lirtheiin lui a dai kai ṭhinna lai hi lirtheiin a dai kai theih leh hun, fûr zawhah lei hi siamṭha tura hmalak mek a ni.

▶ Darlak-Bawngva inkara Teirei lei RCC bridge hi Gayatri Project thawh a ni a, contract tihtawp a nih avangin hna thawk chak thei tur contractor dang thlan nan re-tender turin hmalak mek a ni.

▶ Tuidam kawng hi kawng chhe zual lai hmun hrang hrangah concrete pavement-in siam a ni a, concrete hi curing period a la nih avangin kawng a tlo zawk theih nan lirthei liante chu zawhtir rih loh a ni. Mamawhna a nasat em avangin August 21, 2023 aṭang hian lirthei chi tin tan hawn mai ni se tiin Mamit SP hnenah thlen a ni.

▶ Mamit-Bairabi kawng hi tun hnaia NH-a puan thar a ni a, kawng chhuat siam nan MoRTH-in annual plan-ah cheng vbc. 45 a ruahman a, estimate pawh thehluh a ni tawh. Sum sanction a nih ve leh ṭha zawka siam tum a ni a, tun dinhmuna kawng chhe zual hnawh turin a theih ang anga hmalak a ni.

▶ Dapchhuah-West Phaileng kawng (km. 18) hi PWD enkawl a ni lo a, Border Road Organisation enkawl mek niin, Mizoram PWD-in a chhiat a ṭhatah thu a nei lo.