Kawngpui siama harsatnate sawiho a ni

Kaladan Multi Modal Transit Transport Project (KMMTTP) kawngpui laihna tura ram lâk neitu, Lawngtlai District Land Owners' Association (LDLOA) chuan zangnadawmna pek phûtin sorkar an nawr mek a, chumi chungchang chu nimin khan Lawngtlai DC H Lalhmingthanga hoin a pisaah sawiho a ni.

Ṭhutkhawmah hian Bawrhsap bakah, NH-54 kawngpui zauh hna thawktu te, LDLOA hruaitu te, Central Young Lai Association hruaitute leh sorkar official-te an tel a; KMMTTP chungchanga bakah, NH-54 kawngopui zauh hna thawh meka harsatna awmte chinfel dan tur an sawiho.

LDLOA hruaitute chuan, KMMTTP kawngpui siam chu kum 2010-ah ṭan a ni tawh a, zangnadawmna pek phûtin kum 14 chhung hma an lak tawh thu leh a kaw tàwpah an ṭan tawh thu an sawi a; zangnadawmna pek phûtin August 1, 2023 aṭangin Deputy Conservator of Forests (Wildlife), Chhimtuipui Wildlife Division, Lawngtlai pisaa thawktute chu pisa kai thei loa an dan thu leh KMMTTP siamtute pawh an chêt chhuah an remtih loh thu an sawi bawk.

Lawngtlai DC chuan, LDLOA hmalakna chuan Lawngtlai aṭanga chhim lam leh khawthlang lam mipui tan harsatna a thlen theih avangin hna thawktute'n hna an thawh an remtih loh chu titawp turin a ngen a ni.

NH-54 kawngpui siam hna thawh mekah Lawngtlai leh Kawlchaw West inkara hnathawh a chhe lutuk nia an hriat vanga CYLA-in August 8, 2023 aṭanga Lawngtlaia NHIDCL leh ICT pisa an kalhsak chu August 18, 2023-a CYLA hruaitute leh company hotute'n hna ṭha lo lai a hmuna enho a, ṭha zawka siam tura an inbiakrem hnuah hawn leh a nih tawh thu tarlan a ni. 'Hna ṭha zawk a awm theih nan official-te leh tlawmngai pawlte'n mahni zâwnah hmalak ṭheuh ni se,' an ti.

Bawrhsap H Lalhmingthanga chuan, kawngpuite chu Lawngtlai district mipui inkalpawhna leh ei leh bâr lak luhna kawng pawimawh tak ve ve a nih avangin ṭha taka siam leh enkawl a ṭul thu a sawi a; district mipui tawrhna thlen thei zawnga hmalak ni lo hram se ṭha a tih thu a sawi bawk.