AR-in zirlaite ramri an tlawhpui
2nd Assam Rifles-in Republic Higher Secondary School zirlai 20 leh zirtirtu pahnihte Mizoram khawchhak lama ramri an tlawhpui a, nimin khan 2nd AR Headquarters-ah khàrna inkhawm hman niin, Home minister Lalchamliana'n a hmanpui.
Assam Rifles hian Republic HSS zirlaite leh zirtirtute chu August 16 khan Aizawl aṭanga chhuahpuiin, Ngopa leh Hnahlana AR hmunte bakah, ramria an duty post-te an fanpui a, August 19 khan Hnahlanah Grape Wine Festival-ah an telpui bawk. August 20, Pathianni zan khan Aizawl an rawn thleng leh a ni.
AR hotute chuan, zirlaite tana an thil buatsaih chu naupangte'n ram leh hnam hmangaihna thinlung an put theih nan a nih thu an sawi.
Nimina khàrna inkhawmah Home minister Lalchamliana chuan, AR-te chu tlang mite ṭhian an nih thu sawiin, "Zirlaite India ramah an tír tawh ṭhin a, hengte hi hnam inpumkhatna atan a pawimawh hle. Tun ṭuma tour-ah pawh hian thil thar tawn tam tak an neih ngei ka ring a, thil thlir thiamna pawh an neih belh ka ring. An hma lam hun zelah an ṭangkaipui ngei ka beisei," a ti.
Home Miniser chuan, Assam Rifles-te'n Manipur buainaah an tih tur tak an ti nia a hriat thu leh lawmawm a tih thu te, chumi avang chuan Meitei hoin Manipur aṭangin AR-te la chhuak tura sorkar laipui an ngen hial thute a sawi bawk.