Social media-a thlalak/video tihdarhah fimkhur turin MHIP-in mipui an ngen

Mizo Hmeichhe Insuihkhawm Pawl (MHIP) General Headquarters chuan nimin khan thuchhuah siamin, mipat hmeichhiatna lam hawi thlalak/video social media-a tihdarh chungchangah fimkhur turin mi tin an ngen.

MHIP chuan, social media a ṭha lo zawnga hman vanga hrem tâwk tun hnaiah an awm fo chu pawh an tih thu an sawi a, "Social media hman dik loh kawngah IT Act angin hrem theihna dan hrang hrang a awm a, khawvel thiamna hmangin police-te'n rang takin an chhui chhuak thei zel tawh a, social media hman danah fimkhur turin mi tin kan ngen a ni," an ti.

MHIP chuan, sex video/thlalak thehdarh chungchangah, Information Technology Act Section 67A angin, account neituin ama duh thu ngeia a thehdarh emaw, mi danin an thehdarh emaw pawh ni se, a vawi khatnaah kum 5 thleng tàn leh cheng nuai 10 thleng chawi theih a nih bakah, hrem nawn a nih chuan kum 7 tàntir leh cheng nuai 10 thleng chawitir theih a nih thu an tarlang.

Naupang pawngsual, kutthlak leh khuaikhemna thleng hriat tur a awm zauh zauh tih sawiin MHIP chuan, "Pawi khawihtu chu kum tling lo pawh ni se Juvenile Justice Act, 2015 hmangin hrem theih a ni a, kum tling a nih chuan POCSO Act, 2012 hmangin kum tam tak lungin tàn leh pawisa chawi theih a ni," an ti. MHIP hian fimkhur tura mipui an chah rualin, nu leh pate chu an tu leh fate'n pawi an khawih loh nan nasa zawka inzirtir thar leh turin an ngen a ni.