ZPDS INDBRO Hatchery Farm, Tanhril tihchangtlun AH&Vety Minister-in a hawng

AH&Vety minister Lalrinawma chuan nimin zing khan Zoram Poultry Development Society (ZPDS) hnuaia ar notê leh artui tharna hmun, ZPDS INDBRO Hatchery Farm, Tanhril tihchangtlun a hawng.

Sorkar thuchhuah tarlan danin, ZPDS INDBRO Hatchery Farm tihlen leh tihchangtlunna hi 'Augmentation & Upgradation of ZPDS INDBRO Hatchery Farm, Tahril' tih a ni a, NABARD RIDF-XXVI 2020-21 sum nuai 533.76 hmangin in sak belh a nih bakah, hmanraw hrang hrang lei a ni.

Special Assistance to State for Capital Expenditure (SASCE) 2021-22 sum nuai 445 hmangin 'Upgradation of INDBRO Hatchery Farm for Zoram Poultry Development Society at Tanhril' tih project thawh a ni bawk a, ruhrel awmsa tihchangtlun a nih bakah, hatchery thar, staff quarters thar, tuizem 30KwP Solar leh ṭul dangte siam a ni.

Lalrinawma chuan, ZPDS Farm din a nih aṭanga tun thlenga sorkarah chhiah eng emaw zat an chhûng lut chu fakawm a tih thu sawiin, hmasawn zel tura ṭan la turin a chah a, AH&Vety department hmachhawpte ṭha a tih thu sawiin, "Sa, artui leh bawnghnute thar kawnga intodelh tura ke pênna awmze nei a ni a, mipuiin a zar an zo zel a ni," a ti.

AH&Vety Minister chuan, khawvel changkang zelah thiamna behchhan hmasawnna hrang hrang kalpui a nih thu sawiin, "Mihring pung zel vanga mamawhna nasa tak awm phuhrûk pha ve zel turin thiamna mila kan kal thiam ve zel a pawimawh," a ti a; AH&Vety department-a thawkte chu hmasawnna thar ber berte chhawr ṭangkai zel thei tura inpuahchah tur leh insiamrem zel turin a fuih.

ZPDS INDBRO Hatchery Farm tihchangtlun hawnnaah hian Veterinary, Fishery & Sericulture Board vice chairman C Lalmuanpuia, MLA khualzahawm niin, thu a sawi a; MLA dang pahnih Zothantluanga leh H Lalzirliana te an tel bawk.

Kum 1987-a din Regional Broiler Chick Farm (RBCF) chu kum 2013-14 khan tihchangtlun niin, Zoram Poultry Development Society INDBRO Poultry Hatchery Farm, Tanhril tih a ni a, ar chi hnih - brown layer leh rainbow rooster-te enkawl a ni. May 18, 2015 aṭanga tun hun thlengin farm aṭang hian artui 25,70,740 leh ar notê 16,98,100 thar a ni tawh a, sorkarah chhiah Rs 32,85,679.89 a chhûng lut tawh bawk.