MNF sorkarin cheng nuai thum min risk-pui, an hlawhchham - BJP President

BJP, Mizoram Pradesh president Vanlalhmuaka chuan nimin khan an party pisaa political session-ah thu sawiin, MNF sorkarin Mizo mipuite cheng nuai thum an risk-pui a, an hlawhchham niin a sawi.

Vanlalhmuaka chuan, MNF sorkar chuan kum 5 chhung Mizoram mipuite Delhi khawpuiah a vahvaih­pui nia sawiin, "Cheng nuai thum min risk-pui a, kan hlawhchham ṭhak. CM leh a kaihhruaite vawi tam tak Delhi-ah kalin, kutruakin an lo haw leh ṭhin. Kan minister rualte leh MP-te vawi tam tak airport-ah hmuak ṭhin mah ila, thil ṭha hawn sawi tur an nei lo," a ti.

Sorkar laipuia sorkar lai party apiang state-ah pawh sorkartir a ṭul nia sawiin Vanlalhmuaka chuan, "NE state-ah Congress party-te'n BJP an zawm dual dual a, chuvang chuan ṭhenawm state-ah chuan central blessing dawngin development nasa takin a thleng chur chur mai," a ti a; Lal Thanhawla kaihhruai Congress party-in BJP zawm dial se chuan Mizoramah nasa takin development an thlen tur thu a sawi.

Mizoram BJP President chuan, "Mizoram mamawh tak tak hai chhuak a, kan ramah seng lut tur chuan BJP sorkar kan mamawh," a ti a; kumina MLA inthlanpuiah Mizoram hmasawnna atan BJP thlang turin mipui a ngen. "Mizoram hi kan ram a ni a, Zo fate Jerusalem atan a taka siam turin BJP chuan Mizoram hi a hmasa berah kan dah a, Mizoram aṭang hian thil ṭha chauh a chhuak tur a ni tih hi kan thupui a ni tur a ni," a ti bawk.