ILP atana sum chawi ngai tihdanglam a ni

Mizoram sorkar chuan India mi (hnam dang), Mizorama lut turte tana Inner Line Permit (ILP) a pek chhuahnaa pawisa pek ngai ṭhin hrang hrang a tidanglam a, fee tam zawk chu tihpun a ni. Application fee pakhat chu tihhniam a nih laiin, kum hnih dam ILP atana pawisa chawi ngai erawh chu a lêt kuain a pung.

ILP la tura pawisa pek ngai zat chi hrang hrangte hi Mizoram Council of Minister meeting, January 27, 2020-a neih chuan a pawm a, chumi hnuah, February 4, 2020 khan Home department chuan notification chhuahin, hman ṭan nghal a ni ta a ni.

Home department-in notification chhuaha ILP rate hrang hrang a tarlan danin, kum hnih dam - regular ILP la tura pawisa (fee) chawi ngai chu Rs. 2,000 aṭangin 20,000-ah tihpun a ni a, hemi atan veka security deposit pek ngai pawh Rs. 2,000 ni ṭhin chu Rs. 20,000-ah tihsan a ni.

Regular ILP (thla 6 dam) atana fee pek ngai chu Rs. 270 aṭangin 2,000-ah tihsan a ni a, security deposit pek ngai ṭhin Rs. 1,000 chu a lêta tipungin Rs. 2,000 a ni tawh.

Temporary ILP (ni sarih dam) atana fee chawi ngai Rs. 120 ni ṭhin chu Rs. 150-ah tihpun a ni a, temporary permit (ni 30 dam) atana pawisa chawi ngai Rs. 200 erawh chu tihdanglam a ni lo.

Hetih lai hian, ILP application fee man chu an tlahniam thung a; ILP thar (fresh) siamna tura application fee man Rs. 270 ni ṭhin chu Rs. 150-ah tihhniam a ni a, a tlakhniamna hi a zatve a tling ṭêp. ILP awm tawh sa tihnunna (renewal) atana application fee Rs. 150 erawh tihdanglam a ni lo. Rate tharah hian application fee - fresh leh renewal hi Rs. 150-ah hrût rual a ni.