Inkhârkhip vanga khawpuia harsatna Sorkarin a ngaihthah - Congress party

Mizoram Pradesh Cong­ress Committee (MPCC) chuan thuchhuah siamin, Assam-a kawngpui dan leh Aizawla inkhàrkhip vanga harsatna thleng chu MNF sorkarin a ngaihthah thu leh ṭanpuina pek uar a ngaih thu an tarlang.

MPCC chuan, Covid-19 vanga inkhârkhipin chhung­kaw tam tak a tihbuai leh ramria buaina vanga harsatna thlenga Mizoram sorkar hmalakna an duhkhawp loh thu sawiin, "Mizoram sorkarin Manipur aṭangin oil leh LPG lak dan ngaihtuah mah se, mipui mamawh phuhru thei tur khawp erawh a ni lo a, thlamuanpui tham a ni lo. AMC area lockdown a nih lai meka Lailapur-a kawngpui dan a ni leh zel hi Aizawl khawpuiin a tuar na zual a ni," an ti.

Aizawla inkhàrkhip leh Assam-a kawngpui dan vangin ni tin mamawh chi hrang hrang lei tur a váng ṭan a, tualchhunga thar thlai man a to hle tawh thu sawiin MPCC chuan, ''Mizoram sorkarin Aizawla chawhmeh chi hrang hrang, a bikin tualchhunga thar thlai man a thunun thei lo," an ti a; thil man thunun tuma hmalakna pawh a awm loh thu leh Assam-a supply phur lirthei táng mekte hruai chhuah tuma hmalakna mumal sorkarin a neih loh thu an sawi. 

Congress party chuan, Aizawla inkhârkhip vanga khawsak harsa zawkte ṭanpuina tura ruahmanna sorkarin a la nei lo tih sawiin, "Lockdown hmasa lama ṭanpuina lama mipui kan chêt chhuah nasat angin tunah kan chêt chhuah tawh bawk si loh avangin chhungkaw tam tak mangangin an rûm mek. Covid-19 nasa taka a darh avangin lockdown puan hi sawisel theih ni lo mah se, hemi vanga harsatna tâwkte khaichhuahna tur ruahmanna MNF sorkarin a nei lo hi kan dem hle a ni," an ti.

MPCC chuan, sorkarin harsatna tâwk mek mipui ṭanpuina tur ruahmanna a neih loh avangin ṭanpuina pek kawngah mipui an harh thar a pawimawh thu an sawi a; task force leh Central YMA ruahmanna anga YMA branch kaltlanga mi rethei zawkte ṭanpuina lama nasa zawka ke pên a ṭul thu an sawi bawk.