KHAWTHLIR

KTP-in thisen pe

KṬP, Kolasib Diakkawn Branch chuan an din champha vawi 69-na pualin nimin khan an kohhran diamond jubilee hall-ah thisen pek an huaihawt a, Kolasib District Hospital tan thisen unit 41 an pe a, petute mipa 26 leh hmeichhia 15 an ni.

BSI-in tanpuina pe

Bible Society of India (BSI), Andhra Pradesh Auxiliary chuan Manipur tualchhung buaina vanga ráltlânte ṭanpuina atan nimin khan Central YMA hnenah Rs 2,50,000 an hlân. Ṭanpuina sum hi BSI, Andhra Pradesh Auxiliary secretary Rev. Kandikonda John Vikram-a'n CYMA assistant secretary Prof. Malsawmliana hnenah a hlan a ni. BSI Andhra Pradesh Auxiliary hian Manipur buaina vanga harsatna tâwkte tan ṭanpuina eng emaw zat an pe tawh a, hun remchangah Churachandpur-ah kalin ṭanpuina pek leh an tum bawk.

MNF inkhawm

MNF party chuan nimin khan an pisa, Mizo Hnam Rûnah chhung inkhawm an nei a; thu sawitu Phairothanga chuan, ZPM party-in an thupui 'Kalphung thar' tih chu hrilhfiahna an la hre lo niin a sawi a, "Ṭhalaite hi bàwl mai mai leh hmuh hniam chi an ni lo a, ṭhalaite báwl kuala hmanruaa hman tum party an hlawhchham fo. Ṭhalaite hmangaihtu leh hmakhaw sialtu MNF bawk hi an sorkar leh ngei ang," a ti.

Punkhawm khap

Vawiin leh naktukah Mizoram Legislative Assembly session neih a ni dawn a; hei vang hian Aizawl District Magistrate chuan Assembly session chhungin Aizawl Dak Inpui aṭanga Raj Bhavan chhimlam gate inkar leh Tennis Court aṭanga Treasury Bazar inkarah mi panga aia tam punkhawm leh bengchhen a khap.

Kimna Kailawn

Lallunghnema lehkhabu ziah, 'Kimna Kailawn' tih chu nimin khan MJA president C Lalrambuatsaiha'n Aizawl Press Club President Room-ah a tlangzarh. Lehkhabu hi phek 150-a chhah, Rs 150 man a ni a, Synod Bookroom leh Baptist Bookroom-ahte zawrh a ni.