AMC inthlan neih hun turah Covid-19 dinhmun ngaichâng

Mizoram State Election Commission (SEC) chuan Aizawl Municipal Corporation (AMC) inthlan hun tur puan chungchangah Covid-19 lêng mek din­hmun an ngaichâng mek.

Vanglaini palai zawhna chhangin state election commissioner (SEC) Laima Chozah chuan, AMC inthlan hun turah SEC nodal department GAD hotute nen an inbiak reng thu a sawi a, "Boruak thlir chungin GAD lam nen kan inbe reng a, keini chuan direct-in department dang kan biak a thiang ve lo. Boruak awm dan azirin inthlan hun atan rawtna kan siam ang," a ti.

Laima Chozah sawi danin, SEC chu hripui lêng a ziaawma AMC inthlan buatsaih thei turin an inbuatsaih reng a, boruak a ziaawm veleh inthlanna buatsaih an duh a, electronic voting machine (EVM) pawh an la khawm ṭan tawh. Health department ngaihdante pawh lâk a ngai dawn thung.

Tuna AMC coun­cillor ni mekte chu November 26, 2015-a thlan an ni a, December 10, 2020-ah an term a tàwp dawn. November 26, 2015-a inthlanna buatsaih ve tho Lai Autonomous District Council (LADC) inthlan hun tur pawh SEC chuan a la puang lo.

SEC Laima Chozah sawi danin, LADC inthlan hun tur hi puan theih a ni tawh a, mahse, Lawngtlai khawpui chhungah hmun pa­hnihah containment area puan a nih avangin an dinhmun ngaihchàn leh rih a ni.