Kawng chhiat thu House-ah sawi a ni: Damlo pahnih kawngah an thi - NK Chakma

Nimin khan Mizoram State Legislative Assembly pariatna ṭhutkhawm vawi 12-na ṭan a ni. Session-ah hian West Tuipui bialtu MLA Nihar Kanti Chakma chuan, Lunglei leh Tlabung inkar kawngpui a chhiat tak zet thu sawiin, "Kalkawnga thi damlo pahnih an awm," a ti.

INC member Nihar Kanti Chakma hian calling attention hmangin thu a sawi a, "Lunglei-Tlabung kawng National Highway 302 a chhe em em a, ni tin mamawh phur lirtheite an kal tlang thei lo. Mipui an mangang tawh tak zet a, Tlabungah buhfai lei tur pawh a awm tawh lo. Kan lifeline kawng a chhiat chhan hi mipuiin hriat kan duh," a ti.

Assembly session-a tel tur pawhin a motor-in a kal thei lo tih sawiin NK Chakma chuan, "Pick-up-ah ka rawn chuang phei a ni. Zing dar 8 velah kan rawn chhuak a, tlaiah kan thleng chauh. Ka taksa a la fit ṭha chungin ka taksa a ná vek. A bikin damlo an mangang zual hle," a ti a, ambulance-te tlân duh pawh ni se, an tlân theih loh thu a sawi.

West Tuipui Bialtu MLA chuan, Tlabung khaw mi damlo pahnih kalkawngah an thih tawh thu sawiin, "Kawng chhia puh vek theih ni lo mah se, kawng ṭha pangngai niin, tluang takin kalpui theih ni se chuan an nunna chhan hman a nih ka beisei," a ti.

Kawngpui a chhiat lutuk avangin mipui rilru a nat thu sawiin NK Chakma chuan, "Kei pawh ka rilru a na tak zet. Bialtu MLA ka nihna ang pawhin hrehawm ka ti hle a, zahthlak pawh ka ti," a ti a; kawngpui ṭha an neih thuai theihna atana hma la turin sorkar a ngen a ni.

PWD enkawltu chief minister Zoram­thanga chuan, Lunglei-Tlabung kawng chu National Highways & Infrastructure Development Corporation Ltd. (NHIDCL)-in an enkawl leh siam lai a nih thu sawiin, "Fûr nen a innang a, harsatna a thlen," a ti.

Chief Minister chuan, Lunglei-Tlabung kawng chu km. 96-a thui a ni a, hlâwm (package) hnihah ṭhen a nih thu sawiin, "Hrangchalkawn aṭanga Chhûmkhûm leh Chhûmkhûm aṭanga Tlabungah ṭhen a ni," a ti a; kawng siamna atan cheng vbc. 1,439 pek a nih tawh thu a sawi.

Hrangchalkawn aṭanga Chhûmkhûm chu December 30, 2022-a zawh tur a ni a, Chhûmkhûm aṭanga Tlabung chu January 9, 2023-a zawh tura tih a nih thu sawiin Zoramthanga chuan, "December 31, 2024-a zawh hman theih beisei a ni ta chauh a ni. Hna timuangtu ber chu zángnadawmna leh forest clearance buaipui chhung rei lutuk a ni," a ti.

Chief Minister chuan, Lunglei-Tlabung kawng chu NHIDCL enkawl a nih avangin PWD-in tih theih an nei tam lo nia sawiin, "Chutihrualin, mipui harsatna sukiang turin NHIDCL kan nawr ve reng a ni," a ti a; fûr a zawh hunah kawngpui ṭha tak an sial chhuah vat a beisei thu a sawi.