Lumpsum higher secondary school pakuain Adhoc grant-in-aid-ah hlàn kài an phût

Mizoram Govt. Lumpsum Aided Higher Secondary School Association (MIGLAHSSA) chuan, lumpsum aided HSS pakuate adhoc grand-in-daih dinhmunah August 28, 2023 ral hma ngeia hláng kai turin Mizoram sorkar an phût a; an phût anga sorkarin hma a lak loh chuan sikul an khàr dawn thu an puang.

MIGLAHSSA chuan, kum 2018-a MLA inthlan dawnah tuna Chief Minister leh cabinet minister ṭhenkhatin lumpsum HSS pakuate chu adhoc grant-in-aid ah hlàn kai an tiam tih an tarlang a, "Vawiin thlenga tihhlawhtlin a la awm lo hi lungchhiatthlak kan ti," an ti.

MIGLAHSSA chuan, adhoc grant-in-aid dinhmuna hlàn kai ngei beiseiin August 28, 2023-ah lehkha zir loin sorkar thu ngaichângin sikul an kal dawn a, sorkar aṭangin thu lawmawm an hmuh loh chuan sikul khârin sorkar thu an ngaichâng zui dawn tih an puang a ni.

"Kum 20 chhung zet VC, khawtlang mipui, zirlai nu leh pa leh thawktute'n an lo hahpui tawh zirna-inte hian beiseina sang tak nen sorkar kan thlir a, zirna ngai pawimawhtu kan sorkar hian khawtlang phurrit kan zirna-inte hi rei lo têah adhoc grant-in-aid hmanga min phurh chhâwk ang tih kan beisei tlat a ni," an ti bawk.

MIGLAHSSA hnuaiah hian higher secondary school pakua a awm a; chu'ngte chu - Thingsulthliah HSS, Farkawn HSS, Zobawk HSS, Zawlnuam HSS, West Phaileng HSS, East Lungdar HSS, NE Khawdungsei HSS, Phullen HSS leh Tuisualral HSS-te a ni.