AAP-in Mizo siam zu zawrh an duh

Aam Aadmi Party (AAP), Mizoram hruaitute chuan nimin khan Aizawl Press Club-ah thuthar thehdarhtute an kâwm a; Mizorama sorkarna an siam hunah Mizo buh leh thei hrang hrang hmangin Mizo zu chi hrang hrang, wine leh beer-te dan hnuaiah siam a nih dawn thu an puang.

AAP, Mizoram vice president Lalngaihawma Pachuau chuan, The Mizoram Liquor (Prohi-bition) Act, 2019 hnuaiah zu a tam a, hmun hrang hrangah ualau taka lei tur a awm thu leh zu hmuh theihte chu a chhiat thu a sawi a, "AAP hian rorelna dawhkân kan chelh a nih ngai chuan industrial policy hnuaiah Mizo buh leh thei hrang hrang - lakhuihthei, dragon fruit, balhla, káwlthei, fú, sawhthing leh a dangte hmangin zu chi hrang hrang, wine leh beer-te dan fel tak hnuaiah siam a ni ang," a ti.

Dan hnuaia zu siam chu kut hnathawktute khaichhuah theihna policy pawimawh pakhat a ni dawn nia sawiin Lalngaihawma chuan, "Mizoram páwn thlenga hralh tlâk khawpin hma kan la dawn a, ṭhalaite leh kut hnathawktute nasa takin a chawi kàn dawn bakah, tourism thlengin Mizoram tan sum tam tak siamna a ni ang," a ti a; India leh ram dang siam zu chungchangah chuan mipui ngaihdan lain, mipui tam zawk ngaihdan angin khap emaw, zawrh emaw kalpui a nih dawn thu a sawi.

AAP hruaitute chuan, damdawi-in hrang hranga damlo zinga a tam zawk chu zu kaihhnawih vanga damlo an nia sawiin, "Mi tih ngam loh tih a, mi sawi ngam loh sawi hi kan ram tana ṭha tur a nih zawk dawn chuan kan tiin kan sawi zel dawn," an ti.