Sorkar hnathawkte an nuar dawn; Notification anga DA pek an phût

Mizoram sorkar hnathawkte chu sorkar notification ding lai anga dearness allowance (DA) pek an phût avangin August 28, 2023 aṭangin ni thum chhung an nuar dawn a, an hnathawhna hmuna kal chungin hna an thawk dawn lo.

Sorkar hnathawk páwl hrang hrang intèl khawmna, Federation of Mizoram Government Employee & Workers (FMGEW) General Council nimina ṭhukhawm chuan, sorkar notification anga DA pe tura sorkar kar nan August 28-30, 2023 chhung pen/tool down strike kalpui an rêl. An nawrh chhung hian hna an thawhna hmunah kal tho siin, hna an thawk dawn lo a ni.

FMGEW General Council-in a rêl dan chuan, an thil phût tihlawhtling tura sorkar nawrna atan ni thum chhung pen/tool down strike an nei phawt ang a; chu chuan awmzia a nei lo a nih chuan August 31 leh September 1, 2023-ah mass casual leave (a huhoa chawlh) an la dawn. Mass casual leave-in awmzia a neih loh zel chuan an kal zel dan tur September 3, 2023-ah an rêl leh ang.

An thil phût chungchangah FMGEW hruaitute chu August 21, 2023 khan chief minister Zoramthanga'n a lo kâwm tawh a, sorkar sum din-hmunin a zir rih loh avangin an thil phût chungchangah sorkar dinhmun hrethiam rih hrâm tur leh lungawi lohna lantir titawp turin a lo ngen a ni.

Chief Minister ngenna chungchanga Vanglaini zawhna chhangin FMGEW hruaitute chuan, "Chief Minister-in min ngenna hi meeting-ah sawi chhuah a ni a, mahse, kan pawm thei ta lo a ni," an ti.

Tarlan tawh angin, sorkar notification anga DA pek phûtna atan hian sorkar hnathawkte chuan August 17-18, 2023 khan badge dum an lo bel tawh bawk.