KHAWTHLIR

Home tanpui

UDPA department chuan DAY-NULM hnuaia Shelter for Urban Homeless component aṭangin Serchhip district-a shelter/home pangaah bungrua chi hrang hrang an pe. Bungruate hi ZOAR Urban Deprived Childrens Home, Unity Orphanage Home, Observation Home, Shalom Special School leh Beiseina In (Old Age Home) hotute hnenah Serchhip DUDO Gaston Vanlalhriatpuia'n a pisaah a hlàn a ni.

Hnathawh enpui lo

PWD changtu chief minister Zoramthanga chuan INC member C Ngunlianchunga zawhna chhangin, NHIDCL-in Zemabawk leh Tuipang inkar kawngpui NH-54 laih zauh hna an thawh mek chu Mizoram PWD-in a enpui loh thu Assembly House a hrilh.

Sak that tum

ZPM member VL Zaithanzama zawhna chhángin PWD enkawltu chief minister Zoramthanga chuan, Aizawl DC office sak ṭhat tum a nih thu House a hrilh. Chief Minister tarlan danin, Aizawl DC office sak ṭhatna turin estimate cheng vbc. 49.71 siam a ni a, administrative approval nghah mek a ni. Hna ṭan hun tur sawi theih a la ni lo.

MLA-in lirthei pe

Aizawl South-ll bialtu MLA Lalchhuanthanga chuan nimin khan a bial chhunga YMA, Tlangnuam Branch hnenah a fund aṭanga a lei pick-up (4×4) a pe a, YMA Library-a dah tur lehkhabu chi hrang hrang 23 a pe nghal bawk. Lalchhuanthanga chuan, a biala YMA branch ṭhenkhat - Tuikhuahtlang, ITI Veng leh Salem Veng branch-te hnenah pick-up a lo pek tawh thu a sawi.

Kawngpui dang leh

Mamit Truck Owner Association (MTOA) chuan an district-a kawngpui leh lei siamṭha tura sorkar kar nan nimin khan a ni hnihna atan Mamit district-a kawngpui ṭhenkhatte an dang leh. He thu ziah lai hian sorkar hotute nen an inbe mek a, kawngpui dan hi vawiinah an chhunzawm dawn leh dawn loh hriat chian a la ni lo. Kawngpui an dan chu - Mamit-Bairabi, Zamuang-Bairabi leh Dapchhuah-West Phaileng te a ni.