MSACS bike 11 leh lab. bungrua vailiam

Mizoram State AIDS Control Society (MSACS) hnuaia New Bike Outreach kaltlanga district tin tuam tur bike 11 leh AYUSH health & wellness centre (HWC) 38-a hman tur mini laboratory services bungruate chu nimin zing khan Health & Family Welfare minister Dr R Lalthangliana'n MINECO péngṭhuam aṭangin a vailiam.

Sorkar thuchhuah tarlan danin, MSACS New Bike Outreach hmang hian Mizoram hmun kilkhâwr zawkahte HIV vei leh vei loh endik, damdawi pek, HIV danna sem, counseling leh ṭul dangte tih a ni dawn a, laboratory technician-te'n an thawk dawn. Mamawhna hmun leh high risk group (HIV kai hlauhthawnawm) mi harsate pan chilh theih a ni bawk.

Health & wellness centre 38-a laboratory bungrua sem tur truck 16 hmanga phurh chhuahte chu hmun kilkhawr tak taka awmte hman ṭangkai theih tur thisen leh zun endikna te, thil dang endik ṭul zuala hman ṭangkai turte a ni a; HWC-te chu AYUSH doctor-te'n an ṭhutchilh a ni.

HFW Minister chuan, Bike Outreach Service leh HWC tihchangtlunna tur bungrua vailiamte chu hriselna lama hmasawnna, dam reina leh nunna chhanna tura hmalakna a nih thu sawiin, hriselna lama bung thar kaina a nih thu a sawi a, "Hriselna hi hmasawnna tura pawimawh tak, sum leh pai thlenga nghawng nei a ni," a ti.

Health Minister chuan MSACS Bike Outreach kalpuina turin National AIDS Control Organisation (NACO)-in bike leina a tum bakah, PATH-in thawktute rawihna tur an tum thu a sawi a, department-a thawkte chu inpekna nena thawk tura chahin, "In ṭhahnemngaihnain rah ṭha a chhuah ngei dawn a ni," a ti a; HWC tana hmanrua pek chhuahte'n hmasawnna a thlen ngei a beisei thu a sawi.

Vailiamna inkhawmah hian HFW secretary Esther Lal Ruatkimi, principal director Dr PC Lalramliana, NHM mission director Dr Eric Zomawia, MSACS project director Dr Lalthlengliani leh official dangte an tel a; MSACS joint director Betty Lalthantluangi leh AYUSH deputy director Dr S Mara Thansiami ten technical report an pe a ni.