Doctor lâk tur kan hmu zo lo, lâk tur in hriat chuan kan la ang - Health Minister

Nimina Assembly session-ah Health & Family Welfare minister Dr R Lalthangliana chuan, doctor lâk tur an hmuh zawh loh thu a sawi a, "Lak tur in hriat chuan National Health Mission (NHM) hnuaiah kan lo la nghal ang," a ti.

HFW Minister chuan, doctor indaih lohna a nasa hle tih sawiin, "Kan term chhungin pension-in 25 an chhuak a, Zoram Medical College-ah mi pakua awm nghetin an awm a, deputation-in paruk an awm bawk. Parukin nunna an chán a, post graduate zir mek 25 an awm," a ti a; doctor post ruak hrang hrangte chu an hnawhkhah theih rih loh thu a sawi.

Sorkara a ngheta thawk tur doctor la thei rih loh mah se, NHM hnuaiah chuan an la thei reng tih sawiin Dr R Lalthangliana chuan, "NHM hnuaiah hian khawpuia awm tur lâk tur pawh kan hmu zo lo. Private damdawi-in lama thawh an duh zawk zel. Doctor lâk tur hi zawn tak takin kan zawng a, kan hmu zo lo a ni. Lâk tur in hriat chuan rawn sawi u la, kan lo la nghal ang," a ti.

ZPM group leader Lalduhoma chuan, health care scheme hnuaiah damlo bill bá cheng vbc. 62.89 a awm mek thu sawiin, "Damlo an mangang hle a, ṭhenkhat chu an thi hman. Sorkar hian priority pein, tun sorkar chhung hian clear theih beisei a ni em?" tiin a zawt.

Lalduhoma zawhna chungchangah hian Health Minister chuan, thla hmasa khan health care scheme atan Finance department-in cheng vbc. 20 an pek chhuah thu sawiin, "Tun thlaah min pe leh ang em kan hre lo. Sum harsatna karah theihtawpin min release sak ṭhin," a ti a; ADB aṭanga sum pûk tur cheng vbc. 1,000 vangin boruak a êng zawngin a kal niin a sawi.