Myanmar aṭanga kuhva tawlhtute aṭangin sorkarin sum hmuh a nei lo - Home Minister

Home minister Lalchamliana chuan nimina Assembly session-ah INC member C Ngunlian-chunga zawhna chhángin, Myanmar aṭanga kuhva rah tawlhtute aṭangin Mizoram sorkarin pawisa hmuh a la neih loh thu House a hrilh.

C Ngunlianchunga chuan, social media-a a lan danin, Myanmar aṭanga kuhva tawlhtute'n check gate-a police duty-te hnenah gate paltlang nan pawisa tam tham tak tak an cháwi ṭhin tih kuhva tawlhtute ngeiin an sawi tih a sawi a; Myanmar aṭanga kuhva tawlhtute aṭangin gate paltlangna sum Mizoram sorkarin a hmuh tawh zat a zawt a ni.

Home Minister chuan, Myanmar aṭanga kuhva tawlhtute hnen aṭangin gate paltlangna sum Mizoram sorkarin hmuh a la nei lo tih a sawi a, "Check gate duty-te'n pawisa an lak leh lak loh finfiahna tak a awm thei rih lo," a ti.

Hetih lai hian Lalchamliana chuan, Mamit district lam check gate-a police duty ṭhenkhat, an duty laia kuhva rah phur lirthei an kaltlangtir avangin police duty pahnih chu hrem an nih thu leh pakhat dang vaukhàn (warning) a nih thu House a hrilh.

Home Minister tarlan danin, Mamit district-ah Myanmar aṭanga lak luh kuhva rah phurtu lirthei 44 man a ni tawh a; a theih ang angin Mizoram Police check gate-te tihchangtlun zel a ni.