Kolasib DC leh Cachar DC an inkâwm

Kolasib DC leh Cachar DC chu nimin khan Dholai Police Station conference hall-ah inkâwmin, ramri chungchang an sawi dun a; tun hnaia Assam registration nei Alto car eng emaw zat Kolasib paltlanga Mizorama lut an awm ṭhin chu uluk zawka thlithlai a pawimawh thu an sawi.

Kolasib bawrhsap John LT Sanga chuan, Kolasib district leh Cachar district chu ramri thui tak inṭâwm an nih angin, a ṭul apiangah inpui tawn tur leh boruak muanawm siam tura thawhhona ṭha a awm a pawimawh thu a sawi a; ṭhutkhawm hmasaa an lo rel tawhte bawhzui dan a tarlang.

Cachar district thuneitute chuan, kumina Mizoram MLA inthlanpui neih tura inbuatsaihna kal mekah a ṭul apiangah puih an inpeih reng thu an sawi.

Inkawmnaah hian Kolasib district aiawhin Bawrhsap bakah, SP Lalrinawma Ṭaite, district forerst officer Margaret Lalramchhani, SDO (Sadar) Cheemala Shiva Gopal Reddy, Vairengte SDO (Civil) Lalremruata Sailo leh DIPRO Hmingthanzuala te an tel. Cachar district aṭangin bawrhsap Rohan Kumar Jha, SP Numal Mahatta bakah, Cachar DFO leh Additional SP-te an tel bawk.

ṬHUTKHAWMA SAWIHO DANGTE

▶ Ramri-ah zin mite'n harsatna an tawh loh nan ramria sipai leh police duty-te a ṭul anga tihtlem hret hret a pawimawh.

▶ Ramri kâna ruihhlo leh dan loa ramsa tawlh awm ṭhin véng tura thawhho chungchang.

▶ Ramria state pahnih Forest department mi leh sate'n hmalak an tum apiangin harsatna a thlen loh nan inhrilh hmasak ṭhin.