Champhaiah NIPUN Bharat tlangzarh

Champhai District Education Committee chairman James Lalrinchhana, bawrhsap chuan nimin khan Champhai Education Training Hall-ah Samagra Shiksha hnuaia kalpui tur, National Education Policy (NEP) 2020 hmanga hmalakna, National Initiative for Proficiency in Reading with Understanding and Numeracy (NIPUN) Bharat a tlangzarh.

Tlangzarhna inkhawmah hian Samagra Shiksha deputy district project coordinator Laldingliani Ralte kaihruaiin Zo NIPUN Bharat thutiam sawi rual a ni.

NIPUN Bharat hi Champhai district-a pawl 2 leh a hnuai lam zirlai awmna sikul tinah kalpui tur a ni a; Bawrhsap chuan, NIPUN Bharat kaltlangin Champhai district-a naupangte'n an zirlaiah thiamna tak tak an neih theih ngei a beisei thu a sawi a, NIPUN Bharat thil tumte a hlawhtlin theih nan zir chiang a, ṭha taka kalpui turin kal khawmte a chah.

NIPUN Bharat-in a tum chu, naupangin zirna innghahna lungphûm pathum - ziak, chhiar leh chhiarkawp an thiam theih nan zirna boruak ṭha an neih theihna tur siam te, zirna-in chu dam chhunga an ṭangkaipui tur zir chhuahna hmuna siam te, naupangte'n hriatthiamna tak tak nen zirna awmze nei leh hlimawm an neih theihna tur siamte a ni.